Mu mpindi ya watumwa, iwumba ilitici ilya ‘watumwa na waeluda mu Yerusalemu,’ awano walinji mwi wumba lino likatungulula wano wapingulanga pa vintu ivicindame sana vino vyakumile iwungwe lya Wina Klistu awapakwe. (Imilimo 15:2) Pa kuti wazumilizyanye pa cintu cimwi wakonkanga vino Amawaliko yakulanda na vino umuzimu wa kwe Leza wawatungulula. (Imilimo 15:25) Wonye wo-o avino na wa mwi wumba lino likatungulula wakacita.

Alili wumba lino Leza akawomvya ku kucita ukulonda kwakwe. Awanawitu awapakwe awa mwi Wumba Lino Likatungulula wakunda sana Izwi lya kwe Leza swinya wamanya sana vino umulimo witu wufwile ukuwombwa nga ni vya kucita pa vintu vinji vino vikumile imipepele yitu. Wakasunkana cila sabata ku kulanzyanya vino awanawitu wakusowezya insi yonsinye. Ukukola vino cawanga mu mpindi ya watumwa, na sweswenye wakatusunda ivya mu Baibolo ukupitila mu makalata, nanti mwakangalila wa miputule na mu wantu wanji. Co-o calenga awantu wa kwe Leza ukulemana nu kuwombela ponga insi yonsinye. (Imilimo 16:4, 5) Wano wawa mwi Wumba Lino Likatungulula awano wakawomba umulimo wakwavwa awantu ukusambilila pe Leza nu kutuwomelezya sana ukutwalilila ukuwizya pa Wufumu, swinya awano wakawomba nu mulimo wakusonta awonsi wano wakawomba imilimo milekane lekane mu mawungwe.

Wakakonka vino umuzimu wa kwe Leza wukuwatungulula. Wano wawa mwi Wumba Lino Likatungulula wakakonka uwutunguluzi wa kwe Yehova, wino wayana Ukuteka mwi yulu na munsi nu wa kwe Yesu, Umutwe wi wungwe. (1 Wakorinte 11:3; Waefeso 5:23) Wasiyilola ukuti antunguluzi zya wantu wa kwe Leza. Lelo weni ponga na Wina Klistu awapakwe “wakatwalilila ukukonka Umwana wa Ng’onzi [e Yesu] konsinye kuno akuya.” (Ukuwumbulika 14:4) Awa mwi Wumba Lino Likatungulula wakatemwa sana nga ca kuti tukuwapepelako.

• Uzye awaweni wano watungululanga mu mpindi ya watumwa?

• Uzye awa mwi Wumba Lino Likatungulula wakakonka wuli uwutunguluzi wa kwe Leza?