Mu sekulu ya kuli vanga kua kele ka civunga ka “vapostolo na vakuluntu ku Yelusalema” vaze va puile civunga ca vantuamena, vakele na ku hangula vika va pandele ku linga vantu mu cikungulukilo cose ca Vakua Kilistu. (Vilinga 15:2) Ntsimbu kanda va hangule vika Vakua Kilistu va pande ku linga, vakele na ku simutuila vati cimpande caco ca likuatele na Mbimbiliya kaha vakele naua na ku vundila linga sipilitu santu i va tuamenene. (Vilinga 15:25) Na lelo Civunga ca Vantuamena ce ku kava lungano luaco.

Njambi a li na ku ci pangesa mu ku linga cizango ceni. Vamuanetu va ku vuavesa ve ku pangela mu Civunga ca Vantuamena ve ku kavangeya vili mu Mbimbiliya kaha va pua va ku-hia cikuma mu ku endesa na ku tala vati vipanga via Kilistu vi na pande kuenda. Ve ku likungulula simano ku simano linga va mone vika vi tondeka kuli vamuanetu mu mavu ose. Ngeci mua ku sekulu ya ku livanga, vakua Civunga ca Vantuamena ve ku mamuna vikungulukilo na vilongesa via mu Mbimbiliya mu ku tuma mikanda ni ku hitila mu tuniungi va ku zinguluka. Eci ce ku lingisa vamuanetu vose ha mavu va kale na visinganieka vimo na vilinga vimo. (Vilinga 16:4, 5) Civunga ca Vantuamena ce ku viukisa via-ku-lia via mu sipilitu na ku tu kolesa linga tu tualeleho ku ambulula muzimbu ua vuangana, kaha ce ku hangula vandolome na ku va hana viteli via mu cikungulukilo.

Ce ku ononoka ku ku tuamenena ca sipilitu ya Njambi. Civunga ca Vantuamena ce ku kavangeya vimamuna via Yehova na mutue ua cikungulukilo Yesu Kilistu. (1 Kolintu 11:3; Efeso 5:23) Ava vandolome vetu kave ku lipamba nguavo vakevo vamiata va vantu va Njambi. Vunoni hamo na vakua Kilistu va ku vuavesa ve ku “kava muana Mpanga [Yesu] kuose ku a ya.” (Ku-Solola 14:4) Vakua Civunga ca Vantuamena ve ku sakuila cikuma nga tu vundila nguetu Njambi a vezikise.

• Veya va puile vakua Civunga ca Vantuamena mu sekulu ya ku livanga?

• Vati Civunga ca Vantuamena ce ku tonda ku tuamenena ca Njambi?