Kema itstoyaj apóstoles, se keskij “tlayolmelauanij uan ueuejtlakamej” tlen Jerusalén kinyakanayayaj toikniuaj. Kema monekiyaya mochiuas tlen tlauel ipati, inijuantij kiijtouayayaj tlake mochiuaskia uan nopa sekinok katli nojkia yaskiaj iluikak kichiuayayaj (Hechos 15:2). Kema kiijtouayayaj tlen mochiuaskia, kitemouayayaj tlen kiijtoua Biblia uan kikauayayaj ma kinyakana toTeotsij itonal (Hechos 15:25). Ipan ni tonali Katli kinyakanaj Jehová itlajtoltemakauaj nojkia kej nopa kichiuaj.

ToTeotsij kichiua tlen ya kineki kema kintekiuia. Katli kinyakanaj Jehová itlajtoltemakauaj uan tekichiuasej iuaya Jesús tlauel kipatiitaj toTeotsij iTlajtol. Inijuantij kiijtouaj kenijkatsa moneki tijchiuasej toteki uan nojkia kiixtomaj tlen tlamachtia Biblia. Sejse chikueyi monechikouaj uan kiitaj tlake kinpoloua toikniuaj ipan nochi Tlaltipaktli. Uan kej uejkajkia mochiuayaya, nama nojkia techiljuiaj ika Biblia tlake tijchiuasej; kema techtlajkuiljuiliaj, kema techpaxalouaj toikniuaj chijchikuasej mestli o ika sekinok toikniuaj. Kej nopa toTeotsij itekipanojkauaj kipiaj sanse inintlalnamikilis uan nochi sansejko mopaleuiaj (Hechos 16:4, 5). Inijuantij nojkia kichiuaj tlamachtili tlen ika techmachtiaj, techpaleuiaj ma tikitakaj tlauel moneki titlajtolmoyauasej uan kiitaj ajkia inijuantij nojkia uelis tlatekipanosej kej ueuejtlakamej o tlapaleuianij.

Kikauaj ma kinyakana toTeotsij itonal. Katli kinyakanaj Jehová itlajtoltemakauaj kitemouaj ma kinyakana Jehová Katli kinauatia Nochi, uan Jesús katli kiyakana tlanechikoli (1 Corintios 11:3; Efesios 5:23). Amo kinitaj kej ininaxkauaj toTeotsij itekipanojkauaj. Uan kej sekinok katli tlanauatisej iuaya Jesús, nojkia “kitokiliaj nopa Pilborregojtsi [Jesús] kampa ueli kampa yaui” (Apocalipsis 14:4). Katli techyakanaj techtlaskamatiliaj miak pampa tijtlajtlaniaj toTeotsij ma kinpaleui.

• ¿Ajkia inijuantij kinyakanayayaj toikniuaj kema itstoyaj apóstoles?

• ¿Kenijkatsa nama kitemouaj ma kinyakana toTeotsij Katli kinyakanaj Jehová itlajtoltemakauaj?