Mu zana ro kutanga ro makore, ciboka cidoko, co “vapostori no matombo o gungano” ro Jerusarema, cakashanda inga mukhumbi unotonga kuti ciite zvisungo zvinosisira mu kubesera maKristu ese o kuzojwa o ungano. (Maitiro o Vapostori 15:2) Pavaizwirana pa zvisungo, wainga muuyo wo kubhuisana ngo zvinoreva matahwa zve votendera kutungamirihwa ngo mujimu mucena wa Mwari. (Maitiro o Vapostori 15:25) Ndizvona zvinoteverehwavo nyamasi uno.

Iwona unoshandiswa ndi Mwari kuti uite zvaanoda. Hama jo kuzojwa jinoshanda mu Mukhumbi Unotonga jino cido cikuruwani no Izwi ra Mwari zve vanouzivi hunoshanda kubva mavari mukutungamirira shwiro jo kumujimu. Iwona unosongana bviki ngo bviki kuti ubhuisane ngo zvinodiwa zvo hama jo nyika yese. Inga mu zana ro kutanga ro makore, iwona waipekeja jijiso jakacijikira mu Bhaibheri, pikija ngo kushandisa tsamba kana vavonereri vanofambira. Mukhumbi Unotonga unovangisa rubatano mu murangariro no zviito pakati po vandhu va Mwari. (Maitiro o Vapostori 16:4, 5) Mukhumbi Unotonga unovonerera kunajirihwa ko zvokuha zvo kumujimu, unokurumijira basa ro kucumaera Umambo zve unovonerera kugajwa ko hama jinokwaniriswa kuti jive no mutoro.

Ivona vanodavira kutungamirihwa ngo mujimu wa Mwari. Mukhumbi Unotonga unoringira ku Mukuru-muku, Jehova zve ku Musoro wo ungano, Jesu kuti vawane ndhungamiro. (1 VaKorinto 11:3; VaEfeso 5:23) Ndhengo jawo ajizvitutumaji pacajo inga vatongi vo vandhu va Mwari. Ivona, pamwepo no maKristu o kuzojwa, “vanotevera Bvuta [Jesu], kwese ko rinoenda.” (Apokalipse [Cakapangijihwa] 14:4) Mukhumbi Unotonga unobongesea maningi kuukumbirira kwatinoita.

• Ndiani wainga mu mukhumbi unotonga mu zana ro kutanga ro makore?

• Mukhumbi Unotonga nyamasi uno, unopsakisa kudini ndhungamiro ya Mwari?