Pan achto siglo, onoya se̱ comité yej kiojkuiltiaya tanechko̱lismej, pan iní̱n comité onoyaj «apóstoles wan yej tayaka̱nayaj pan Jerusalén». Yejeme̱n kijtowa̱yaj te̱ monekiá makichi̱wakan nochi tokni̱wan yej Dios kitapejpen iga maya̱kan ajko (Hechos 15:2). Iga makimatikan te̱ makichi̱wakan, yejeme̱n momachtia̱yaj Itajto̱l Dios wan moojkuiltiayaj iga iyespíritu (Hechos 15:25). A̱man Comité yej Kiojkuiltiá yej Tajto̱lmoya̱waj de Jehová, ijko̱nsan no̱ kichi̱waj.

Dios kikui iní̱n Comité iga makichi̱wa yej yéj kineki. Tokni̱wan yej ya̱skej ajko wan onokej pan iní̱n comité, pux kinekij Itajto̱l Dios, wan kimatij kén mataye̱ʼojkuilti̱kan wan kén matamachti̱kan pan Biblia. Monechkowaj cada semana iga makitakan kén makipale̱wi̱kan tokni̱wan de nochi Ta̱jli. Ijko̱nsan ken mochi̱waya pan achto siglo, tene̱xtiliáj pan Biblia te̱ matikchi̱wakan, iní̱n wel asi pan se̱ carta o wel te̱ijliá yej tayaka̱na de circuito o seuʼmej tokni̱wan. Iní̱n kichi̱wa iga nochimej matikpiakan se̱san tajla̱mikilis wan matisentekipanokan pan ia̱ltepe̱ʼ Dios (Hechos 16:4, 5). Yejeme̱n no̱ kichi̱waj iga matikpiakan a̱matajkuilo̱lmej kan matimomachti̱kan Biblia, te̱yolketsaj iga matitajto̱lmoya̱wakan de Irreinoj Dios wan kitaj a̱ʼ yéj welij kipiáj ma̱j tekipano̱lis pan ia̱ltepe̱ʼ Dios.

Mo-ojkuiltiáj iga iyespíritu Dios. Comité yej Kiojkuiltiá yej Tajto̱lmoya̱waj de Jehová, kite̱mowaj iojkui̱ltilis de Jehová iga yéj tekiwaj de nochi Ta̱jli wan cieloj, wan no̱ kite̱mowaj iojkui̱ltilis Jesús iga yéj kiyaka̱na tanechko̱lis (1 Corintios 11:3; Efesios 5:23). Ini̱nmej tokni̱wan ayá̱ momachi̱liáj ken ite̱ko de ia̱ltepe̱ʼ Dios. Ijko̱nsan ken kichi̱waj seuʼmej tokni̱wan yej ya̱skej ajko, «kitokatiawij al Cordero [Jesús] kansan iga maya̱wi» (Revelación 14:4). Iní̱n comité te̱tasojka̱makaj iga tiktajtaniliáj Dios iga makipale̱wi̱kan.

• ¿A̱ʼ yéj kiojkuiltia̱yaj tanechko̱lis pan achto siglo?

• ¿Kén kite̱mowa iojkui̱ltilis Dios el Comité yej Kiojkuiltiá yej Tajto̱lmoya̱waj de Jehová?