Wɔ ɛvoya mɔɔ limoa la anu, menli ekpunli ekyi bie, “ɛzoanvolɛma ne nee mgbanyima ne mɔ mɔɔ wɔ Gyɛlusalɛm” la, zonlenle kɛ neazo eku na bɛzile kpɔkɛ mɔɔ hyia la bɛmaanle Kilisiene asafo ne kɔsɔɔti mɔɔ ɛnee bɛkpokpa nuhua menli ne la. (Gyima ne 15:2) Mekɛ mɔɔ bɛkɛzi kpɔkɛ wɔ koyɛlɛ nu la, ɔkile kɛ bɛ muala bɛzuzu mɔɔ Ngɛlɛlera ne ka la anwo na bɛmaa Nyamenle sunsum ne ɛhile bɛ adenle. (Gyima ne 15:25) Neazo ko ne ala a bɛdi ɔ nzi ɛnɛ a.

Nyamenle ɛlɛdua ɔ nwo zo yeayɛ ye ɛhulolɛdeɛ. Mediema mrenyia mɔɔ bɛkpokpa bɛ mɔɔ bɛsonle wɔ Neazo Eku ne anu ɛnɛ la anye die Nyamenle Edwɛkɛ ne anwo kpalɛ na bɛlɛ anwubielɛ wɔ kɛzi bɛdi yɛ gyima ne yɛɛ sunsum nu edwɛkɛ nwo gyima la anu. Dapɛne biala bɛyia nu bɛsuzu ewiade amuala mediemayɛlɛ ne ngyianlɛ nwo. Kɛ mɔɔ ɛnee ɔde ye wɔ ɛvoya mɔɔ limoa anu la, ɔdua ngɛlata anzɛɛ neavolɛ adenduvoma nee menli gyɛne nwo zo ɔfa adehilelɛ mɔɔ gyi Baebolo ne azo la ɔmaa. Ɛhye maa Nyamenle menli suzu edwɛkɛ nwo na bɛbɔ bɛ ɛbɛla wɔ adenle ko ne ala azo. (Gyima ne 16:4, 5) Ɔmaa yɛ sunsum nu aleɛ, ɔmaa Belemgbunlililɛ nolobɔlɛ gyima ne anwo anwosesebɛ, na ɔnea ɔmaa bɛkpa mediema mrenyia mɔɔ bɛfa gyima bɛwula bɛ sa nu la.

Ɔdi Nyamenle sunsum ne adehilelɛ nzi. Neazo Eku ne kpondɛ adehilelɛ fi Anwuma Nee Aze Belemgbunli Gyihova yɛɛ Gyisɛse, mɔɔ le asafo ne Ati la ɛkɛ. (1 Kɔlentema 11:3; Ɛfɛsɛsema 5:23) Menli mɔɔ wɔ nu la ɛmbu bɛ nwo kɛ bɛle Nyamenle menli ne adekilevoma. Bɛ nee Kilisienema mɔɔ bɛkpokpa bɛ la amuala di “Boaneralɛ ne [Gyisɛse] anzi wɔ ɛleka biala mɔɔ ɔlɛkɔ la.” (Yekile 14:4) Bɛ nye die asɔne mɔɔ yɛyɛ yɛmaa bɛ la anwo.

• Nwane mɔ a ɛnee wɔ ɛvoya mɔɔ limoa neazo eku ne anu a?

• Kɛzi Neazo Eku ne kpondɛ Nyamenle adehilelɛ ɛnɛ ɛ?