KAPITOLA 20
Ko hine o phrala, so ľidžan adaďives amari organizacija?
O phrala, so dodikhenas pre perša kresťanska zbori
Genel pes ľil, so bičhade ola phrala le zborenge
Pal o perša kresťanska zbori pes starinelas cikňi skupina, andre savi sas o apoštola the o starši andal o Jeruzalem. On dodikhenas pre buťi, so kerenas savore pomazana kresťana. (Skutky 15:2) Sigeder, sar vareso rozhodňinde, ta rodenas e goďi andro biblicka zvitki a modľinenas pes, kaj lenge te pomožinel o svato duchos. (Skutky 15:25) Avka ada hin the adaďives.
O Del len použinel, kaj pes te splňinel leskero lav. Ola paru pomazana phrala, so ľidžan amari organizacija, presikaven paťiv la Biblijake; den goďi, sar nekfeder te kerel e buťi, pre savi dodikhen; odphenen pro naboženska otazki. Sako kurko pes zdžan a premišľinen, so kampel le phralenge pal calo svetos. Avka, sar o apoštola, the adaďives den amen biblicka pokini prekal o ľila, krajska the aver služobňika. Ada pomožinel le Devleskere ľudoske, kaj te mišľinen a te keren savoro jekha goďaha. (Skutky 16:4, 5) Ala phrala dodikhen, sar pes pripravinel o duchovno chaben a kaj mek te en o phrala menovana andre zodpovedno buťi. Pomožinen, kaj amen o jilo te cirdel buter te zvestinel.
Domukhen, kaj len te ľidžal Devleskero duchos. O phrala, so ľidžan amari organizacija, hine rado, hoj pes pal lende starinel o nekbareder vladcas, o Jehovas the o Ježiš Kristus čiže o šero le zboroskero. (1. Korinťanom 11:3; Efezanom 5:23) On pestar na keren, hoj hine varesave veduca andro Devleskero ľudos. Džan jekhetane savore pomazane kresťanenca pal o bakroro [pal o Ježiš] všadzik, kaj džal. (Zjaveňie 14:4 NZ) On hine igen rado, hoj pes vaš lenge the vaš lengeri buťi modľinas.
-
Ko dodikhelas pre buťi, savi kerenas le Jehovaskere služobňika, sar dživenas o apoštola?
-
Sostar dičhol, hoj o phrala, so ľidžan amari organizacija, pes mukhen pro Del?