Sha ayange a mbaapostoli la, “mbaapostoli man mbatamen” kpuaa “ken Yerusalem” lu mbahemenev mba shin itine. Ve lu eren tom u tsuan akaa a hange hange a yange gba u Mbakristu jimin cii, mba i tsegha ve sha jijingi la vea dondo yô. (Aerenakaa 15:2) Yange vea gbaan zwa môm sha kwagh yô, i lu sha ci u ve time sha kwagh u Ruamabera a er sha ikyaa shon la shi ve de ér icighan jijingi u Aôndo a hemen ve. (Aerenakaa 15:25) Nyian kpa, ka gbenda u mbahemenev mba shin itine ve dondon je la.

Aôndo ngu eren tom a ve sha u kuren awashima na. Anmgbianev mba i tsegh ve sha jijingi, mba ve lu Mbahemenev Mba Shin Itine la, mba a gbashima sha kwagh u Mkaanem ma Aôndo kpishi shi ve fa u tesen se gbenda u se er tom wase u Mbakristu la man u nan mbamlumun sha mbampin mba ior ve pinen sha akaa a ken Bibilo la. Mba kohol imôngo ken hanma kasua sha u nengen sha mbamgbe mba anmgbianev tar sha won cii. Ka ve wa se kwagh ken Bibilo sha u ngeren se uwashika shin sha ikyev i mbakuran mba ningir sha man mbagenev kpaa, er mbahemenev mba shin itine mba sha ayange a mbaapostoli la kpa eren nahan. Kwagh ne ngu a wase ior mba Aôndo u lun a mhen môm shi eren kwagh ken mzough. (Aerenakaa 16:4, 5) Mbahemenev Mba Shin Itine mban mba nengen sha tom u ngeren ityakerada i pasen se akaa a ken Bibilo la shi mba taver se cii asema ér tom u pasen kwagh u Tartor la u lu kwagh u hiihii ken uma wase, shi mba nengen sha kwagh u tsuan anmgbianev veren ve sha ityom kposo kposo ken atôônanongo.

Mba eren kwagh u jijingi u Aôndo a tese ve la. Mbahemenev Mba Shin Itine mba suur sha Yehova, u a lu Uhembansha la man sha Yesu, u a lu Ityough ki nongo u Kristu la, sha u ve hemen ve, vough er mbahemenev mba shin itine mba sha ayange a mbaapostoli la kpa eren nahan. (1 Mbakorinte 11:3; Mbaefese 5:23) Mba nengen ayol a ve ér ve mba mba hemen ior mba Aôndo ga. Ve kua Mbakristu mbagen mba i shigh ve mkurem mbara cii mba “dondon Waniyôngo hen ape A ze cii.” (Mpase 14:4) Mbahemenev Mba Shin Itine ka ve wuese er se eren mbamsen sha ci ve kua tom u ve eren la yô.

• Ka unô yange ve lu mbahemenev mba shin itine sha ayange a mbaapostoli laa?

• Mbahemenev Mba Shin Itine mba keren u dondon gbendatesen u Aôndo nyian nena?