I te henituli muamua, ko he vaega taigole, “te kau apohitolo ma nā toeaina” i Ieluhalema, nae kavea ma he vaega pule e fai nā tonu tāua ma fai ma hui o nā fakapotopotoga Kelihiano uma e fakauku. (Galuega 15:2) Kāfai na fai ni a latou tonu lototahi, na fakaiku mai tā latou talanoa ki nā mea e taku mai e nā Tuhituhiga Paia ma lolo ki te takitakiga a te agaga o te Atua. (Galuega 15:25) Ko te ata tēnā e mulimuli ki ei i nā aho nei.

E fakaaogā e te Atua te Vaega Pule ke fai tona finagalo. Ko nā uho fakauku e kaukauna i te Vaega Pule, e matuā fiafia ki te Kupu a te Atua ma e lahi te latou poto mahani i te fai lelei ma te aogā o nā matakupu fakateagaga. E fetaui fakatahi ki latou i nā vaiaho takitahi ke mafaufau ki nā manakoga o te kau uho i te lalolagi kātoa. E vē ko te henituli muamua, e fōki atu nā fakatonuga e fakavae i te Tuhi Paia, e kui mai nā tuhi pe e ala mai nā tino tauhi malaga pe iē tahi. E fehoahoani atu ki nā tino o te Atua ke mafaufau ma gaoioi i he auala kautahi. (Galuega 16:4, 5) E tauhi e te Vaega Pule te hauniuni o nā meakai fakateagaga, ma fōki atu te fakamalohiga ke fakamuamua te galuega tālaki o te Mālō, ma taukikila nā tofiga o nā uho ma nā tiute taukave.

E talia nā fakatonuga mai te agaga o te Atua. Ko te Vaega Pule e kikila atu ki te Pule Hilihili Kehe, ko Ieova ma te Ulu o te fakapotopotoga, ko Iehu, mo te takitakiga. (1 Kolinito 11:3; Efeho 5:​23) E hē manatu vēia nā hui iēnei ko ki latou ko ni takitaki o nā tino uma o te Atua. Ko ki latou, fakatahi ma nā Kelihano fakauku kātoa, e “mulimuli ki lātou ki te Punuāmamoe [Iehu] i ho he mea e fano ki ei.” (Fakaaliga 14:4) E loto fakafetai te Vaega Pule mo a tatou tatalo e fai mo ki latou ma te latou galuega e fai.

• Ko ai nā tino nae i te vaega pule i te henituli muamua?

• He ā te auala e hakili ai e te Vaega Pule te fakatakitakiga mai te Atua i nā aho nei?