Ka nkama wa vapostola, aku ni ntlawa wawutsongo wa ‘vapostola ni vakulukumba’ aYerusalema lava ava tirha tani hi ntlawa lowu rhangelaka swaku va yendla swiboho swa lisima leswi nyimelaka bandla hinkwalu la Vakreste lavanga totiwa. (Mintirho 15:2) Swiboho swa vona hinkwaswu aswi seketeliwa ka Matsalwa naswona ava landzela nkongomiso wa moya lowokwetsima. (Mintirho 15:25) Leswo swaha yendliwa ni namuntlha.

Wu tirhisiwa hi Xikwembu swaku wu yendla kurhandza ka xona. Vamakwerhu lavanga totiwa lava vumbaka Ntlawa Lowu Rhangelaka, vali tekela nhlokweni Rito la Xikwembu naswona va ni xiperiyensiya ka kuyendla swiboho leswi fambisanaka ni ndlela leyi ntirho wa hina wu faneleke wu yendliwa hi yona ni ka kutlhantlha timhaka leti fambisanaka ni swa wukhongeli. Va tlhangana vhiki ni vhiki swaku va bula hi swilaveko swa vamakwerhu amisaveni hinkwayu. Namuntlha, vahi nyika swileleto leswi sekeliweke Bibeleni hi kutirhisa mapapila, vadjikelezi kumbe vanhu van’wana hilaha aswi yendliwa ha kona nkameni wa vapostola. Leswo swi pfuna vanhu va Xikwembu swaku va yendla swilo ni kupimisa hi ndlela leyi fanaka. (Mintirho 16:4, 5) Ntlawa Lowu Rhangelaka wu vonelela ntirho wa kululamisela swakudla swa moya, wu khutaza hinkwerhu swaku hi rhangisa ntirho wa kuchumayela naswona wu vonelela mhaka ya kulanga vamakwerhu lavangata nyikiwa malunghelo ya makulu.

Wu fambisiwa hi moya wa Xikwembu. A Ntlawa Lowu Rhangelaka wu landzela swileleto swa Mufumi wa Matilo ni Misava kunga Yehovha ni wa Nhloko ya bandla kunga Yesu Kreste. (1 Vakorinto 11:3; Vaefesa 5:23) A lava vumbaka ntlawa lowu ava titeki tahi hi tihosi ta vanhu va Xikwembu. Vona kupatsa ni Vakreste hinkwavu lavanga totiwa va “landzelela Xinyempfana [Yesu] hinkwaku lomu xi yaka kona.” (Nhlavutelo 14:4) A Ntlawa Lowu Rhangelaka wa tlangela swinene loko hiwu khongelela ni kukhongelela ntirho lowu yendliwaka.

• I vamani lava ava lumba ntlawa lowu rhangelaka ankameni wa vapostola?

• Namuntlha, a Ntlawa Lowu Rhangelaka wuswi kumisa kuyini swileleto swa Xikwembu?