Бирги векте Иерусалимде удуртукчу чөвүлел элчиннерден болгаш удуртукчулардан тургустунган турган. Ол биче бөлүк бүгү шилиттинген христианнар ниитилелинге салдарлыг, шыңгыы шиитпирлер хүлээр турган (Ажыл-чорудулга 15:2). Шиитпир хүлээп алырының бетинде олар Бижилгелерде ол айтырыгга хамаарыштыр чүнү чугаалаанын көргеш, Бурганның сүлдезиниң удуртулгазынга чагыртып турган (Ажыл-чорудулга 15:25). Бөгүн Иегованың Херечилери ол үлегерни эдерип турар.

Бурган бодунуң күзел-соруун күүседир дээш, оларны ажыглап турар. Удуртукчу чөвүлелде бараалгап турар шилиттинген акылар Бурганның Сөзүн аажок үнелеп турар. Олар библейжи болгаш амыдырал-биле холбаалыг айтырыгларга улуг арга-дуржулгалыг. Олар бүгү делегейде ха-дуңманың хереглелдерин сайгарар дээш, неделя санында чыглып турар. Бирги векте дег, ол акылар Библияга үндезилеттинген удуртулганы чагаалар, кожуун хайгааракчылары болгаш оон-даа өске бараалгакчылар таварыштыр берип турар. Ооң ачызында Бурганның чонунда чаңгыс аай, демниг чорук тергиидеп турар (Ажыл-чорудулга 16:4, 5). Удуртукчу чөвүлел библейжи дептерлерни белеткээрин болгаш харыысалгалыг акыларны томуйлаарын харыылап турар. Оон ыңай Чагырга дугайында суртаал ажылын чорударын база деткип турар.

Олар Бурганның сүлдезиниң удуртулгазынга чагыртып турар. Удуртукчу чөвүлел бүгү талазы-биле Дээди Өрүкү Иеговага болгаш, христиан ниитилелдиң Бажы болур, Иисус Христоска чагыртып турар (1 Коринфичилерге 11:3; Эфесчилерге 5:23). Ол акылар боттарын Бурганның чонунуң баштыңчылары кылдыр санавас. Олар өске шилиттинген христианнар-биле кады «Хураган [Иисус] кайнаар-даа баар болза, ону эдерер улус-тур» (Ажыдыышкын 14:4). Удуртукчу чөвүлелден акыларывыс бистиң олар дээш мөргүлдеривисти аажок үнелеп турар.

• Бирги векте удуртукчу чөвүлел кымнардан тургустунган турганыл?

• Бөгүн Удуртукчу чөвүлел Бурганның удуртулгазын канчаар дилеп турарыл?