Ta sbabial siglo, ay tut jtsojb winiketik te jaʼik te jpuk kʼopetik sok te ancianoetik ta Jerusalén te la yichʼ yaʼtelik jich bitʼil Jtsojb Jwolwanejetik, jaʼik te machʼatik la staik ta nopel te bintik tulan skʼoplal la skʼan pasele jich kʼopojik ta swenta spisil te machʼatik tsabilik te ya xbajtʼik ta chʼulchane (Hechos 15:2). Swenta yuʼun junax kʼot ta nopel yuʼunik te bin la spasike, la yilik ta lek te sJun Dios sok la yakʼ sbaik ta tojobtesel ta swenta te espíritu yuʼun te Diose (Hechos 15:25). Te Jtsojb Jwolwanejetik ta kʼajkʼal ini, jaʼnix jich ya spasik euk.

Jaʼ aʼtejibal kʼoemik te ya stuuntes te Dios ta spasel te skʼanojel yoʼtane. Ta swenta te hermanoetik te tsabilik te ya xbajtʼik ta chʼulchane ay chaʼoxtul te yichʼoj yaʼtelik bitʼil Jtsojb Jwolwanejetik te kʼax bayal skʼoplal ta yoʼtanik te bin ya yal te sKʼop Diose, sok ya snaʼik ta lek spasel te aʼtelil ta swenta te bintik ya skʼan chajpanele soknix te makʼlinel ya yakʼik ta swenta te skʼop Diose. Ta jujun semana ya stsob sbaik yuʼun ya yilik te bintik ya xtuun yuʼunik te hermanoetik ta swolol te Balumilale. Jichnix te bitʼil la yichʼ pasel ta sbabial sigloe, ya yakʼik pʼijubtesel te lokʼemik ta Biblia, jaʼ ini ya spasik ta swenta carta o ta swenta te superintendenteetik te ya x-ulaʼtaywanike soknix ta swenta yantikxan hermanoetik. Jich ya yakʼ te junax te bin ya xkʼot ta nopele sok te bintik ya yichʼ pasel ta lum yuʼun te Diose (Hechos 16:4, 5). Jaʼnix jich ya schajpanik te bitʼil ya smakʼlinotik ta swenta te bin ya yal te Diose, ya stijbotik koʼtantik ta scholel te skʼop Dios sok jaʼnix ya yilik te kʼalal ay ya yichʼ tulan yaʼtelik ta stojol Dios te hermanoetike.

Jaʼ ya stʼunik te tojobtesel yuʼun te schʼul espíritu te Diose. Te Jtsojb Jwolwanejetike ya sleik te tojobtesel te ya x-akʼbotik yuʼun te Jehová te mukʼ Ajwalil yuʼun spisil te bintik spasoj ta chʼulchan sok te Balumilal soknix te Jesús te jaʼ jolol yuʼun te congregacione (1 Corintios 11:3; Efesios 5:23). Te jayeb ta jtul ini maba ya skuyik te jaʼ ya xpasawanik ta mantal ta stojol te lum yuʼun te Diose. Jichnix te bitʼil te yantik sjoʼtak te tsabilik te xbajtʼik ta chʼulchane, «ya stʼunic ta bayuc ya xbaht te Jcolel Tuminchij [Jesús]» (Apocalipsis 14:4). Te Jtsojb Jwolwanejetike ya yal bayal wokol te kʼalal ya jkʼopontik Dios ta stojolike.

• ¿Machʼatik-a te Jtsojb Jwolwanejetik ta sbabial sigloe?

• ¿Bin utʼil ya sleik te tojobtesel yuʼun Dios te Jtsojb Jwolwanejetike?