Ha siyahan nga siglo, usa nga gutiay nga grupo—“mga apostol ngan mga tigurang ha Jerusalem”—an nag-alagad sugad nga nagmamando nga lawas ha paghimo hin importante nga mga desisyon para ha bug-os nga kongregasyon han dinihogan nga mga Kristiano. (Buhat 15:2, NW) Tungod kay ira ginhihisgotan an ginsisiring han Kasuratan ngan nagpapagiya ha espiritu han Dios, nagkaurosa hira ha ira desisyon. (Buhat 15:25) Ito gihap an ginbubuhat han nagmamando nga lawas yana.

Ginagamit ito han Dios ha pagbuhat han iya kaburut-on. An dinihogan nga kalalakin-an han Nagmamando nga Lawas interesado gud ha Pulong han Dios ngan may daku nga eksperyensya ha pag-organisar ngan ha espirituwal nga mga butang. Kada semana, nagkakatirok hira basi hisgotan an mga panginahanglan han kabugtoan ha bug-os nga kalibotan. Pariho ha siyahan nga siglo, an mga instruksyon nga iginbasar ha Biblia igintatagana pinaagi hin surat o nagbibiyahe nga mga paramangno o iba pa. Pinaagi hito, nagkakaurosa an katawohan han Dios ha hunahuna ngan ha buhat. (Buhat 16:4, 5) An Nagmamando nga Lawas nag-oorganisar ha pagpangandam han espirituwal nga pagkaon, nag-aaghat hin kadasig ha pagsangyaw nga buruhaton, ngan nag-aasikaso han mga rekomendasyon han kabugtoan nga kalalakin-an nga mangunguna.

Nagios ito uyon ha giya han espiritu han Dios. An Nagmamando nga Lawas nagpapagiya ha Soberano han Uniberso, hi Jehova, ngan ha Ulo han kongregasyon, hi Jesus. (1 Korinto 11:3; Efeso 5:23) Diri nira gintatagad an ira kalugaringon sugad nga lider han katawohan han Dios. Pariho ha ngatanan nga iba nga dinihogan nga Kristiano, padayon hira nga “nagsusunod ha Kordero [Jesus] bisan diin hiya kakadto.” (Pahayag 14:4) Gin-aapresyar gud han Nagmamando nga Lawas an amon mga pag-ampo para ha ira.

• Hin-o an nagkukompwesto han nagmamando nga lawas han siyahan nga siglo?

• Paonan-o an Nagmamando nga Lawas yana nagpapagiya ha Dios?