Tamy faha apostoly tan̈y, ‘antipan̈ahy ndreky apostoly’ nisolo ten̈a ‘panompo atokisan̈a’ io. Zen̈y filankevipitantan̈ana zen̈y. Iro nikarakara fiangonan̈a jiaby tamy zen̈y. Voahosotro aby iro io. (Asan’ny Apostoly 15:2) Mira raha fataondro taloha tan̈y in̈y fo raha ataondro ‘panompo atokisan̈a ndreky mahadiniky raha’ io izioty. Misy filankevipitantan̈ana misolo ten̈a iro io. Voahosotro aby iro jiaby io. Iro koa fa manapakevitry, ataondro fan̈araka amy Baiboly fo hevitrindro.—Asan’ny Apostoly 15:25.

Jehovah nan̈iraka iro han̈ano sitraponany. Iro voahosotro amy Filankevipitantan̈ana io ten̈a tia mianatra ndreky man̈araka raha koran̈iny Baiboly. Iro io koa efa zatra mamaly fan̈ontanian̈a sarotro momba Baiboly. Isaka herin̈andra iro mivory, mandiniky raha ilainy fiangonan̈a jiaby erantany. Iro koa fa man̈ambara torohevitry baka amy Baiboly, mandefa taratasy na man̈iraka iro pitety faritany aby io. Mampilamin̈y olony Zan̈ahary raha ataondro io, fotony mira fo torohevitry azony fiangonan̈a jiaby. (Asan’ny Apostoly 16:4, 5) Filankevipitantan̈ana man̈aramaso fan̈aboahan̈a fan̈azavan̈a jiaby amy boky isankarazany, ke iro mandrisiky atsika hazoto hitory vaovao tsara . Iro koa manendry olo mety amian̈a andraikitry amy fiangonan̈a.

Fan̈ahy masin̈y man̈ampy iro io. Iro amy Filankevipitantan̈ana io man̈eky marin̈y fa Jehovah Farany Mahery amy raha jiaby. Iro koa man̈eky fa Jesosy pitariky iro, fotony izy Lohany fiangonan̈a. (1 Korintianina 11:3; Efesianina 5:23) Iro jiaby an̈atiny Filankevipitantan̈ana io tsisy an̈abo ndreky ambany fa mira fo. Iro man̈araka raha volan̈iny Jesosy. (Apokalypsy 14:4) Filankevipitantan̈ana aby io ravoravo, izikoa atsika mivavaka baka Zan̈ahary han̈ampy iro aminy andraikitrindro io.

• Azovy ma natao filankevipitantan̈ana taloha tan̈y?

• Karakory ma ataony Filankevipitantan̈ana koa fa hanapakevitry?