Mu yaka 100 yandanda, likuga lya ŵandu ŵamnono, ‘ŵandumetume ni acakulungwa ŵa mumpingo ku Yelusalemu,’ lyatumicilaga mpela likuga lyakulongolela kuti lisaguleje yakutenda yakusosekwa m’malo mwa mpingo wosope wa Ciklistu wa ŵasagulwe. (Masengo 15:2) Ŵasagulaga yakutenda mwakamulana, pakamulicisya masengo yagakuŵeceta Malemba, soni pakuya yawusasile msimu wa Mlungu. (Masengo 15:25) Lelo jinosoni akusatenda yeleyi.

Mlungu akulikamulicisya masengo kutenda lisosa lyakwe. Abale ŵasagulwe ŵakusatumicila mu Likuga Lyakulongolela akusanonyela mnope Maloŵe ga Mlungu, soni akumanyilila cenene kalinganye ka masengo getu gakulalicila, soni kwanga mawusyo gakwayana ni ya dini. Akusacingangana mlungu wuliwose kuti atagulilane yakusosekwa ya unasi wetu wa pacilambo cosope. Mpela muyaŵelele mu yaka 100 yandanda, akusapeleka maloŵe gakamucisya gakutyocela m’Baibulo kupitila mu yikalata kapena kupitila mwa ŵakulolela ŵakwendela ni ŵane. Yeleyi yikusakamucisya kuti ŵandu ŵa Mlungu aganisyeje ni kutenda yindu mwakamulana. (Masengo 16:4, 5) Likuga Lyakulongolela likusalolela kulinganya kwa yindu yakutukamucisya mwausimu, likusalimbikasya wosope kugawona masengo gakulalicila ya Ucimwene kuŵa gakusosekwa mnope, soni kulolela masengo gakupeleka maudindo kwa abale.

Likusajegamila msimu wa Mlungu pakulilongolela. Likuga Lyakulongolela likusajembeceya kulongolelegwa ni Jwakulamulila jwa Yakupanganyikwa yosope, Yehofa, soni Mtwe wa mpingo, Yesu. (1 Akolinto 11:3; Aefeso 5:23) Ŵandu ŵa mu Likuga Lyakulongolela ŵangaliwona kuŵa acimlongola ŵa ŵandu ŵa Mlungu. Jemanjaji, yimpepe ni Aklistu ŵasagulwe, ‘akusakuyicisyaga Mwanangondolo [Yesu] kulikose kwele kwakwawula.’ (Ciunukuko 14:4) Likuga Lyakulongolela likusayamicila patukwapopelela.

• Ana ŵani ŵaŵaliji mu likuga lyakulongolela mundaŵi ja yaka 100 yandanda?

• Ana Likuga Lyakulongolela moŵa agano likusasosa catuli cikamucisyo ca Mlungu?