Ba n nɛɛ “Betɛli” ka Heberum, ya tubusiawa “Gusunɔn Yɛnu.” (Torubu 28:17, 19) Yehofan Seeda Dio ba yĩsi te sua, bu ka ben gbankɔkɔban kãasi tem gira kpuro sɔɔ soku. Min diya ba waasu kobun sɔmburu kpuro dam dokemɔ ma ba te kparamɔ. Yehofan Seeda Diobun gbankɔkɔ bakaɔwa, Sina Asakpɔra wãa, New York, États-Unis n temɔ, saa min diya ba maa ayee ni nu tien sɔma nɔni dokemɔ. Be ba sɔmburu mɔ̀ gbankɔkɔ yi sɔɔ kpuro, ba sãawa nge yɛnu teun tɔmbu, yen sɔ̃na ba be sokumɔ Betɛlin yɛnugibu. Nge mɛ yɛnu teun tɔmbu ba ra ko, ba sɔmburu mɔ̀wa sannu, ba dimɔ sannu, ma ba Bibelin keu mɔ̀ sannu nɔɔ tia sɔɔ.—Womu 133:1.

Ayee giriru garu te sɔɔ, tɔn be ba sãa nge yɛnu teugibu, ba ra tii wɛ̃ ka nuku tia. Betɛlin gbankɔkɔ baayere sɔɔ, Kirisigii tɔn durɔbu ka tɔn kurɔbu ba ra tii wɛ̃ bu ka Gusunɔn kĩru ko, ba sɔmburu mɔ̀ Bandun labaari gean sɔ̃ saa kpuro. (Mateu 6:33) Ben goo ku ra surun gobi mwɛ, adama, ba ra be somi ba n ka kpin yeru ka dĩanu mɔ, ba ra maa be gobi piiko wɛ̃, ben tiin bukatan sɔ̃. Ben baawure sɔmburu mɔ gbankɔkɔ sɔɔ: gabu yirikisiba sɔɔ, gabu doo kobu sɔɔ, gabu maa adɛrɔɔ mi ba ra di. Ben gaba sɔmburu mɔ̀ tire yari yerun masinigia, ǹ kun mɛ mi ba ra tirenu sɔminɛ bu yinɛ. Gabu ba ra maa gbankɔkɔba dɛɛrasie kpa bu yi sɔmɛ, gabu ba ra maa yanu tie, ǹ kun mɛ bu sɔm yãnu sɔmɛ, ǹ kun maa mɛ bu sɔma ganu ko.

Ayee te sɔɔ, ba ra hania ko bu ka Bandun labaari gean kparabu wuswaa daasia. Ye ba naa gire Betɛli baayere sɔɔ, yera Bibelin gee yi nɔɔra tɔmbu kpuron mi. Tire te a garimɔ mini, ta sãawa yen weenasia tia. Ba te yoruawa ka Sina Asakpɔrun yɛ̃ru, maa ba be ba barum tusiamɔ tem baamɛre sɔɔ, yori yi mɔrisia ka intɛɛnɛti, yen biruwa ba te yara tireru sɔɔ ma ba mɔrisia yigbɛnu nge 115 000 ka sɔndiru sɔɔ. Betɛlin yɛnugii baawure u kookari mɔ̀ u ka sɔmbu te nɔma kɛ̃, tu ka wuswaa da, kpa sɔmbu baka tè sɔɔ n weenɛ bɛsɛn laakari kpuro ya n wãa, tu kuura, sɔmbu tera labaari gean waasu kobu.—Maaku 13:10.

• Berà ba sɔmburu mɔ̀ Betɛliɔ, amɔsunwa ba ra ka be nɔɔri?

• Sɔmbu baka terà ba dam dokemɔ Betɛli baayere sɔɔ?