Goran ”Betel” bani sahap Heber mararti ”Rumah ni Naibata”. (1 Musa 28:17, 19) Goran on sosok bani ianan na ipajongjong Saksi-Saksi Jahowa i sab tanoh on, laho mangarahkon pakon manokong horja parambilanon. Pangurus Pusat mangidangi i kantur pusat sadunia i Nagori Bagian New York, AS, anjaha mangawasi parhorjaan i kantur-kantur Saksi-Saksi Jahowa i buei ni nagori. Ibagas kalompok, sidea na mangidangi bani ianan-ianan ai itanda gabe kaluarga Betel. Songon sada kaluarga sidea tading ampa rup marhorja, rup mangan, anjaha rup marlajar Bibel ibagas parsadaan.​—Psalmen 133:1.

Ianan na legan humbai na legan bani sada kaluarga na marhorja ibagas malas ni uhur. Dalahi pakon naboru Kristen na marhorja i Betel mambere gok panorangni laho manghorjahon harosuh ni Naibata ampa mangidangi haporluhon ni Harajaon. (Mateus 6:33) Lang adong na manjalo gaji, tapi bani sidea ipasirsir do ianan pakon sipanganon, anjaha ibere do otik pangurupion laho manutupi pangaluaranni. Haganupan sidea na tading i Betel dong do horjani, ai ma i kantur, i dapur, atap pe i ruang makan. Adong na marhorja bani parsetakan anjaha na mambahen gabe sada buku, na paborsihkon, bagian pakeian, na padear-dearhon barang, pakon na leganni.

Ianan bani na pongkut marhorja, manokong horja parambilanon Harajaon. Tujuan na parlobei bai ganup Betel aima pasirsirhon hasintongan ni Bibel bani halak na mabuei. Buku on aima sada humbani sontoni. Dob isuratkon ibagas pangawasan Pangurus Pusat, buku on itongos marhitei komputer hu ratusan bagian panerjemah i sab tanoh on, isetak bai masin-masin na podas horjani na adong i piga-piga parsetakan Betel, dob ai itongos hu lobih 110.000 kuria. Marhitei haganup horja si sonai, kalurga Betel manokong parhorjaan siporlunan sonari on​—mangambilankon barita na madear.​—Markus 13:10.

• Ise do mangidangi i Betel, anjaha aha do na ipasirsir bani sidea?

• Parhorjaan aha do na porlu tumang na isokong bani parhorjaan i ganup Betel?