Nkobô hébreu, Béthel a tinane na “nda Zambe.” (Metata’a 28:17, 19) Ba loone menda bisaé Bengaa be Yéhôva be bili mesi mesi asu nkañetane mbamba foé na Béthel. Bobejañe ya Tin Ékôane ba saé Béthel ya Amerka, nlam ba loone na New York. Ba nyoñe nlô asu ésaé ja bobane be Béthel ya si se. Bôte bese ba saé be Béthel be ne nda bôte ya Béthel. Ba nyiñe vôme wua, ba di nsamba wua, ba saé a nleme wua a ba yé’é Kalate Zambe nsamba wua.​—Besam 133:1.

Vôme bôte ba saé a nlem ôse ane nda bôt. E be Béthel bese, Bekristene ba saé éyoñ ése asu mfi ya Éjôé Zambe. (Matthieu 6:33) Ba ya’ane ke be. Be bili vôme ya tabe. Ba ve be bidi a ôyôme moné na be jalé miñyiane miap mi ne mfi. Mesu m’ésaé me ne mevale meval: wofis, kisin, nda bekalate, nsôban a nko’one biyé a mame mese mevok.

Vôme ba su’u ésaé nkañetane mbamba foé. Ésaé ja bobane Béthel ja volô na bôt abui be wô’ô mbamba foé. Nsoé kalate wu ô ne ndeme jia ya été. Éyoñe bobejañe ya Tin Ékôane ba mane tili ñye’elan éziñ, be lôme wô bôte ba kôñelane minkobô meval meval. Nane nkôñelan ô mané, be lôme wô minsini a kuli bekalate. Mvuse ya valé nje ba lôme bekalate bete mekônda a lôte 110 000 ya si se. Béthel nnye a su’u bisaé bite bise asu ya na nkañete ô ke ôsu.​—Marc 13:10.

• Beza ba saé Béthel, ye ba ya’ane be?

• Ésaé évé Béthel a suk?