Bétél ntùm ntshob ba Héber bʼa “Ndà Nsi.” (Netoʼde 28:17, 19, lôde mbagde mi mà tun, MN.) A lén a bwô num nebéʼde ba mbaʼ Ghakwénta Yaweh Nsi kut ntùm njù bo nke ntsin bwe kà ntshagde faʼ nesoñ nkùn mebwô là. Tu Ntseʼde nke nkùmdʼà Tèdlaʼ ndùb Warwick, mà États-Unis dʼAmérique, ntsin bwe kà ntshagde faʼ ntùm ba tsemoʼ bontoʼ Tèdlaʼ ntùm ngô ngô yàme. Benntùn tse bo nke mfaʼ mà Tèdlaʼ là bʼa tunndà Bétél. Mba taʼ tunndà là, bo num ntswe, mfaʼa, njù jujù, nziʼde Ntshob Nsi ku ntshùʼ, njoñ i fa ntùm netamde.​—Yobkwi 133:1.

Taʼ dùʼ ze mba zit mèn tunndà lo num mfaʼ ntù ntshùʼ là. Ntùm mba zit bétél lo, Benkristô tse bandum mba tse bènnzwi num mfà wut yub Nsi nkoñkoñ num nefaʼ ze nekô mbèn njab Nufen se mbwe. (Matio 6:33) Bo keʼ be bé sàm mèn netèt bo, ndaʼndù bo num mfà dùʼ ntswe bo, nkém yube mbèn mfà metsit ywimde bo. Mba we lo mà Bétél ghù taʼ faʼ, kʼa be nena jujù, neghabte, kà faʼ ndà lo. Tsemoʼ be mfaʼ dùʼ nefét mbèn ndat ñwaʼni, netshwétte dùʼ, nesôg nzwe, nenabte tshu faʼ, boa tsemoʼo.

Taʼ dùʼ bo num mfaʼ yàm netomde faʼ nesoñ nkùn mebwô là. Mbwe ju mba zit Bétél lo num ndiag là bʼa neghù mbe nenùn Ñwaʼni Nsi kwag benntùn yàme. Yen kam buʼ ñwaʼni li bʼa taʼ mfiʼ. Tu Ntseʼde naʼ tshagde faʼ nekidʼé, bo tshùade num koñnkùn ntshag i ntùm njù sagkuà ba kum benntùn bo tshwèt mbagde là, bo fél i ndende ntùm ba Bétél nzenze, mbèn ntshag ntùm ndà ntseʼde 120 000 kà ntôgde. Bo num mbe faʼ mba zit bag i lo, tunndà Bétél loʼ ze ywimde nseʼ yi num faʼ ndùb​—nesoñ nkùn mebwô.​—Marko 13:10.

• We zʼa num mfaʼ Bétél à? Bo ke ntomde yub à ndùke?

• Faʼ nenànde ze mba zit Bétél lo be ntomde là bʼa zile?