JOKWA 21
Nje ye Bete̱l e?
O̱fis ńa ebol’a maduta, o Amerika
Jaman
Keńa
Kolombia
Eyal’a Bete̱l na Bonahebe̱r e be̱n nde beteledi ná “Ndabo a Loba.” (Bebotedi 28:17, 19) E te̱nge̱ne̱ ná milongi me̱se̱ Mboṅ a Yehova i longino̱ o wase ńe̱se̱ o sue̱le̱ na die̱le̱ ebol’a dikalo, mi belabe̱ na di dina. Dibe̱le̱ di Madie̱le̱ di maja nde o mulopo m’ebolo o New York, o Bekombo be lati ba Amerika. Owo nde ba mombweano̱ ebolo e mabolabe̱ o mikanjo m’ebolo ma wase ńe̱se̱. Be̱se̱ bá mabole̱ ebolo o Bete̱l, bá mabelabe̱ ná mbia ma Bete̱l. Mulemlem ka belongi ba ndabo a mbia, ba maja, ba da, ba bola ebolo, bokwa pe̱ Bibe̱l ka bonasango ba lati wuma iwo̱.—Myenge 133:1.
Mpo̱m ma wuma yená belongi ba mbia be mongwane̱le̱no̱ mō̱ na nune̱. O Bete̱l ye̱se̱ bonasango na bonańango ba boli babo̱me̱ne̱ mususu o bola Jemea la Loba, na jombwea pe̱ myam ma Janea. (Mateo 6:33) To̱ mō̱ ńabu a si makusa musawedi. Nde babo̱ be̱se̱ ba be̱n bwam na tuṅ ońola wum’a benangedi na son a mo̱ni, yena i mongwane̱ babo̱ ońola ngus’a mambo i mapule̱ babo̱. Mō̱ na mō̱ te̱ o Bete̱l a be̱n ebolo e bolabe̱ mo̱. Bō̱ ba mabola ebolo o o̱fis, bane̱ o mwe̱be̱ ma jipe̱, bape̱pe̱ pe̱ o wum’a da. Bō̱ pe̱ ba mabola ebolo o ndabo a druk,nika ńe nde wum’a busise̱ la kalati, o joa na sia la mbo̱ti, po̱ngulane̱ la nje ye̱se̱ ye o bolongi, we̱le̱ bosangi na bene̱ bema bepe̱pe̱.
Wuma yená bato ba walame̱ne̱no̱ o sue̱le̱ ebol’a dikalo la Janea. Ebol’a boso ya Bete̱l te̱ ye nde o jongwane̱ ná bato jita ba kuse so̱ṅtane̱ la belēdi ba Bibe̱l. Nun muna kalati weno̱ o langa e nde eyembilan ewo̱ ya nika. A tilabe̱ nde owas’a betatedi ba Dibe̱le̱ di Madie̱le̱. Ombusa tilabe̱ lao, bá malomea mo̱ ebwea mabe̱le̱ má betukwedi tongwea na inte̱rne̱t. Nde o Bete̱l belongisan be mapomane̱ busise̱ kalati be busise̱ te̱ mo̱, to̱ biana tongwea na medi ma munja, i malomabe̱ o buka na 120 000 la myemba. Mbia ma Bete̱l mu masue̱le̱ ebol’a musunga e buki ye̱se̱, ye nde ebol’a dikalo. Botea ponda kalati e matilabe̱no̱ nate̱na ponda e malomabe̱no̱.—Marko 13:10.
-
Ba nja ba mabole̱ ebolo o Bete̱l e? Nje pe̱ e boṅsane̱be̱ ońol’abu e?
-
Njik’ebol’a musunga Bete̱l te̱ e masue̱le̱no̱ e?
