Hebilunba mabuolu nni Beteli bua yedi “U Tienu diegu”. (Mi Cilima 28:⁠17,19) Ŋanduna dogi tianma nni, Jeova Siedinba pia Beteli diena. Laa yeli tuugi leni yaa tuonli ke bi tiendi bi niini, kelima lanpo ke bi gobidi u laabaaliŋamo kpaanma tuonli, ki go diidi laa tuonli n caa liiga maanma. Li gobiditaanli liiga yaaba cagili ye beteli dieciangu yaala n ye Niu yodiki Eta sini dogu nni. Bi ye lanpo ki ŋua diidi Beteli toe tuona. Bi yii yaaba n tuuni Beteli nni ke “Beteli diegu niba”. Nani u diegu niba, bi taagi tuuni, bi taagi dii, bi go taagi bangi biibili.​—⁠Pisomi 133:⁠1.

Bi tie dieyengu niba, baa tuuni i ligi po ba. Beteli kuli nni, jaba leni puoba n ñani bi yama ki ba kuani bi yula cain U Tienu yanbuama ŋoadima nni, ki yaa tuuni O Diema po. (Matie 6:⁠33) O bakuli ki tuuni i ligi po. Ama bi baadi mi jiema, i duani kaani leni yaa ligi n kaa fu ki baa da yaala n tie tiladi. Beteli nni yua kuli pia o tuonli. Tianba tuuni biilo nni, tianba tiendi mi jiema, bi ŋanbidi ban di naani. Tianba moko duundi a diena, bi ŋuudi ti tiadi. Bi go kubi ŋama ban dua yaa diena nni. Tianba tuuni a tila n ñandi naani, bi go kubi a masina yaala n ñandi a tila yeni.

Bi tuuni u laabaaliŋamo kpaanma n yaa caa liiga. Beteli nni ban tiendi yaala kuli tie ban todi bi niba boncianla n gbadi u laabaaliŋamo yeni. Leni Beteli todima ke ti ba tin muubi yaa tili ne. Li gobiditaanli liiga yaaba cagili n dangi yaa maama n ye a tila kuli nni. Leni internet todima bi tuuni laa tila a tilebida caga yaaba n ye Beteli toe ŋanduna nni. Bani n lebidi laa tila mabuoli toaba nni. Bi yaa lebidi gbeni bi baa soani Beteli yaaba n baa fidi n ñani laa tila, ki soani-​la a nitaana yaala n cie 110 000. Bi tiendi a nia laa tuonli nni, kelima bi bani ke u laabaaliŋamo kpaanma tuonli tie, yaa tuonli n pia ti ñoadi ki cie.​—⁠Marki 13:⁠10.

• Ŋmenbi n tuuni Beteli nni, bi tuuni i ligi po bi?

• Bee tuonli n pia ti ñoadi ke Beteli diegu niba tuuni ke li caa liiga?