Dalam jaku Hebrew, Betel reti iya “Rumah Petara.” (Pemungkal 28:17, 19) Nama tu endang badas ke bengunan ti digaga Saksi-Saksi Jehovah ba serata dunya kena ngatur sereta nyukung pengawa nginjil. Raban ti Ngiring gawa ba indu opis di New York, Amerika Serikat, lalu ari endur nya sida ngemataka pengawa ke digaga pampang opis ba mayuh menua. Semua sida ke gawa ba endur tu dikumbai ruang bilik Betel. Baka diri sebilik, sida diau enggau gawa begulai, makai begulai, sereta sama belajarka Bup Kudus dalam penyerakup.—Masmur 133:1.

Tu endur ti spesial alai diri sebilik gawa enggau ati ti deka. Ba tiap iti Betel, bisi menyadi Kristian lelaki enggau indu ke ngereja peneka Petara enggau pengabis ati sereta gawa penuh jam ke Perintah Petara. (Matthew 6:33) Nadai seiku ari sida nerima upah tauka gaji, tang semua sida bisi disediaka bilik enggau pemakai sereta elaun ke ulih diguna diri empu. Semua ke diau ba Betel bisi diberi pengawa, sekalika ba opis, ba dapur, tauka ba alai endur makai. Bisi mega gawa ba endur nyelak tauka ngegam bup, tauka pengawa ngemas, nuchi gari, nyeruri, tauka pengawa bukai.

Tu endur ke mayuh pengawa kena nyukung meritaka Perintah Petara. Tuju semua Betel kena ngasuh pemendar ari Bup Kudus ditemu enggau naka pemayuh orang. Bup tu siti ari chunto iya. Bup tu ditulis di baruh jaga Raban ti Ngiring, dianjung ngena chara elektronik ngagai beratus iti raban penyalin di serata dunya, dichelak ngena mesin chelak ti laju ba sekeda Betel, lalu dianjung ngagai lebih ari 110,000 iti eklisia. Ari pengawa tu, diri sebilik ba Betel meri sukung ke kereja ti beguna bendar—ngerembaika berita manah.—Mark 13:10.

• Sapa gawa ba Betel, lalu nama utai ke bisi disediaka ngagai sida?

• Nama kereja ti beguna bendar ke disukung ari pengawa ba semua Betel?