Bhi urolo Hibru, Bẹtẹ hi ‘Uwa nọnsi Osẹnobulua.’ (Genesis 28:17, 19) Bẹtẹ hi elin nan tie eje kikẹ nin Esali Jehova mun gbọ nele rẹ gbẹloghe iwẹnna itẹmhọn Osẹnobulua. Otu Ne Sun Oga ọsi Esali Jehova wẹnna bhi Bẹtẹ nọn kokhun nẹn bhi New York nọn ribhi U.S.A. Enin ele da gbẹloghe Bẹtẹ nekẹle bhi agba-ẹbho kikẹ. Ene wẹnna bhi Bẹtẹ rebhe diabi azagba ọkpa. Bii azagba-uwa ọkpa, eko wẹnna, eko nyẹnlẹn, eko le ebale, bi eko luẹ iBaibo kugbe.—Psalm 133:1.

Ejian esili nọn nin eria da sabọ wẹnna rẹ rẹkpa ẹbho. Bhi Bẹtẹ rebhe, ikpea bi ikhuo ri egbe rebhe rẹ lu iho nọnsi Osẹnobulua bi ẹmhọn Agbejele nọnsọle. (Matthew 6:33) Ai ha ele osa, ọrẹ yiriọ, a mun uwa nele ha dia bi a re ebale nele. Ayẹ ri ukpomin igho nele, nele rẹ ha gbẹloghe egbe. Ọdeọde bhi Bẹtẹ mhọn iwẹnna nọnsọle nan zẹ nanlẹn. Eso wẹnna bhi ọfisi, bhi oẹriẹ bi eji ada le ebale. Eso wẹnna bhi eji ada re masini rẹ gbẹn ebe, eso hẹnhẹn ẹkẹ uwa, eji ada họ ukpọn bi iwẹnna nekẹle.

Eji iwẹnna manman ye nanrẹ ri obọ kpa iwẹnna Agbejele. Eba manman wo lu bhi Bẹtẹ ọle hi, nan re ẹmhọn-ata nọn ribhi Baibo nin ọrebhe. Ọnin ebe nan hi ọkpa bhọ. Otu Ne Sun Oga gbẹloghe ebarẹ gbẹn ọnin ebe nan yẹ. Ele ha gbọnlẹn fo, eki ri ọle ji otu ne zedu ọle diọ bhi urolo kẹkẹ, bhi ijian ikikẹ bhi ọnin otọ nan. Eki ri masini nọn tua gbẹn ọnin ebe dagbare bhi ejada ri masini rẹ gbẹn ebe dagbare. Eki ji ọle diọbhi agbotu nọn gbera 115,000 bhi ọnin otọ nan. Nele rẹ ha lu ọnan, azagba-uwa nọn ribhi Bẹtẹ ri obọ kpa iwẹnna itẹmhọn ọta esili nọn yi iwẹnna ejẹje nọn kpọnọ nẹ.—Mark 13:10.

• He bhọ wẹnna bhi Bẹtẹ, barẹ gbẹloghe ele yẹ?

• Be bhọ iwẹnna ejẹje nin ene wẹnna bhi Bẹtẹ robọ kpa?