Betel tana nuka, hebreo chichamjainkia “Yuusa jee” tusar tiniu ármiayi (Génesis 28:17, 19, Traducción del Nuevo Mundo [con referencias] asterisco [*] péteana nui áujsata). Ashí nunkanam Testigos de Jehová mátsatkamuri írunna nuka Betel naartin áiniawai. Nuniánk Yuusa chichamen etsérkarat tusar chichámpruiniawai. Betelnum takákmainiaksha, yurumaíniaksha, tura Yuusa chichamen unuimiátainiaksha, shiir awajnaisar nií shuara ainis iruntrar matsamin áiniawai (2 Kurintiunam 13:11). Tura aintsank, Testigos de Jehová takatrín irúnturar chichamprúkarat tusar anáiramuka, Nueva York (Estados Unidos) Betelnum pujuíniawai. Niinkia ashí nunkanam Betelnum takákmainiana nuna iin áiniawai.

Betelnum Yuusna asúmprusar takákmainiawai. Betélnumka aishmank tura nuwasha Yuusnum tsamakaru nekás enentaijiai takákmainiawai. Nuinkia Yuús wakéramun umíktasar kashí kashinin takakmaá pujuíniawai (Mateu 6:33). Betelnum takákmainiaka akíkchamu áiniawai, niinki wakérusar takákmainiawai. Antsu pujústinniaka tura yurumátniunka suíniawai. Tura aintsank, warinsha ni utsúmamurin sumármakarat tusar kuitian ishichik suu áiniawai. Nui pujuíniaka mashi takakma áiniawai. Oficínanam takakmash, papií najántainiam takakmasha, warinsha iwiarniush, apatkun iniárniusha, nuyá apatkun sukártincha irúnniuiti.

Yuusa anáikiamuri akúpeawai tu etsérkarat tusar ti takákmainiawai. Betélnumka Yuusa chichamen nekasa nuna ashí aents nekaáwarat tusar asúmprusar takákmainiawai (Márkus 13:10). Testigos de Jehová takatrín irúnturar chichamprúkarat tusar anáiramuka Yuusna papiín computadórajai aarar, ashí nunkanam Betel írunna nui, ni chichámejaink yapajiáwarat tusar akuptin áiniawai. Nu akuptúkaram máquinas uuntnum wárichik nukap papiín najanin áiniawai. Juú papiisha aitkiar najánamuiti.

• Betélnumsha ya takákmainia? Tura Betelnum pujusár takákmasarat tusar itiúr yainkma ainia?

• Warí chichama etsérnaki weti tusar Betelnum takákmainia?