Ha ka ktien Hebru, Bethel ka mut “ka ïing U Blei.” (Jenesis 28:17, 19) Ka ïahap bha bad ki ïing kiba la pyndonkam da ki Nongsakhi U Jehobah ha satlak ka pyrthei. Nangne la kyrshan bad la pynïaid ïa ka kam ïalap. Ka Kynhun Pynïaidkam ka trei ha ka tnad treikam baheh duh ha ka nongbah New York, U.S.A., bad nangto ka pynïaid ïa ki kam jong ki tnad treikam kiba don ha bun tylli ki ri. Kum ka kynhun, ïa kito kiba trei hangne, la khot ïa ki ka long-ïing-longsem jong ka Bethel. Kum Shiïing-shisem, ki im bad ki ïatreilang, ki ïa bam lang, bad pule lang ïa ka Baibl da ka jingïatylli.​—Salm 133:1.

Ka jaka bakyrpang ha kaba ki dkhot jong ka ïing ki aiti sngewbha ïalade. Ha man la ki Bethel, ngin shem ba don ki Khristan kynthei bad shynrang kiba aiti ïalade ha ka ban leh ïa ka mon jong U Blei bad ban ai jingshakri ba pura ïa ka Hima. (Mathaios 6:33) Ym don iwei ruh na ki i ban ïoh tulop ne jingsiew, hynrei baroh ki ïoh ïa ka bam, ka jaka sah, bad khyndiat ka jingïarap pisa na ka bynta ka jingdonkam jong ki. Ha Bethel, baroh ki don la ka jong ka jong ka kam, don kiba trei ha ophis, ha kamra shet, ne ha kamra bam. Don ruh kiba shon ne suh kot, kiba treikam ïing, kiba sait jaiñ bad ñiad isteri jaiñ, kiba maramot bad kiwei kiwei de.

Ka jaka ba bunkam kaba kyrshan ïa ka kam ïalap shaphang ka Hima. Ka jingthmu bakongsan ha man la ki Bethel ka long ban pynïoh katba lah ïa ka jingshisha jong ka Baibl sha ki briew baroh. Kane ka kot lyngkdop ka dei kawei na ki nuksa kaba kum kita. La thoh ïa ki hapoh ka jingpeit jong ka kynhun pynïaidkam ïa kaba la phah lyngba ki kor kompiwtor sha ki spah tylli ki kynhun pynkyllaktien kiba don ha satlak ka pyrthei bad la shon ïa ki ha ki kor shon kot kiba sted ha Bethel. Nangta pat, la phah ïa ki sha palat 1,10,000 tylli ki balang. Baroh kiba don ha Bethel ki ai jingkyrshan ïa kane ka kam bakongsan tam—ban ïalap ïa ka khubor babha.​—Markos 13:10.

• Mano ba shakri ha Bethel bad kumno la pynbiang ïa ki?

• Kaei ka kam bakongsan ba la kyrshan ha man la ki Bethel?