Bɛtɛl na Ibru wɔd we min “PAPA GƆD in Os.” (Jɛnɛsis 28:17, 19, futnot) Na dis nem Jiova Witnɛs dɛn gi sɔm pan di bildin dɛn we dɛn gɛt na difrɛn difrɛn pat dɛn na di wɔl. Di wok we dɛn de du na dɛn bildin ya de ɛp fɔ kɛr di prichin wok go bifo. Di Gɔvnin Bɔdi de na di ɛdkwata na Nyu Yɔk insay Amɛrika. Na dɛn de mek shɔ se di wok we dɛn de du na ɔl di branch ɔfis dɛn, kɔmɔt fayn. Dɛn kɔl ɔl di pipul dɛn we de na dɛn branch ɔfis ya, di Bɛtɛl famili. Lɛk ɛni famili we gɛt wanwɔd, na so di Bɛtɛl famili de. Dɛn de liv togɛda, it togɛda, wok togɛda ɛn stɔdi di Baybul togɛda.—Sam 133:1.

Na ples we spɛshal. Ɔlman we de de na wan famili ɛn dɛn de du bɔku tin dɛn fɔ ɛp ɔda pipul dɛn. Di brɔda ɛn sista dɛn we de na Bɛtɛl na pipul dɛn we rɛdi fɔ du wetin Gɔd want ɛn we tek Gɔd wok impɔtant na dɛn layf. (Matyu 6:33) Dɛn nɔ de pe dɛn, bɔt dɛn de gi dɛn ples fɔ slip, tin fɔ it, ɛn smɔl mɔni we dɛn go de yuz fɔ dɛnsɛf. Ɔlman we de na Bɛtɛl gɛt wok fɔ du. Sɔm dɛn de wok na ɔfis, ɛn ɔda wan dɛn de wok na kichin. Sɔm dɛn bak de wok usay dɛn de print ɛn mek buk dɛn. Ɔda wan dɛn de fɔ klin, fɔ bruk, fɔ mek tin dɛn we dɔn pwɛl ɛn fɔ du bɔku ɔda wok dɛn.

Na ples usay dɛn de wok tranga wan fɔ mek di prichin wok go bifo. Di men tin we dɛn de du na Bɛtɛl na fɔ mek shɔ se plɛnti pipul dɛn lan bɔt di tru tin dɛn we de na di Baybul. Dis buk na wan pan di we dɛn we dɛn de du dat. Na di Gɔvnin Bɔdi de mek dɛn de rayt dɛn buk ya. We dɛn dɔn rayt am, dɛn kin yuz kɔmpyuta fɔ sɛn am to ɔl di transletɔ dɛn we de na difrɛn kɔntri dɛn. Afta dɛn dɔn fɔ translet am, dɛn kin mek dɛn print am. Di branch dɛn we de print dɛn buk ya kin yuz fast mashin dɛn fɔ du di wok. We dɛn dɔn mek di buk dɛn, dɛn kin sɛn dɛn na lɛk 110,000 kɔngrigeshɔn dɛn. Di Bɛtɛl famili de du ɔl dis fɔ mek di prichin wok go bifo.—Mak 13:10.

• Udat dɛn de wok na Bɛtɛl, ɛn aw dɛn de kia fɔ dɛn?

• Us wok di Bɛtɛl famili de ɛp fɔ kɛr go bifo?