တၢ်မၤလိ ၂၁
ဘ့ၤသ့လး မ့ၢ်တၢ်မနုၤလဲၣ်
ဧ့ၤဘြံၤအတၢ်ကတိၤ ဘ့ၤသ့လးန့ၣ် အခီပညီမ့ၢ် “ယွၤအဟံၣ်” လီၤ. (၁ မိၤၡ့ ၂၈:၁၇, ၁၉) မံၤအဝဲအံၤန့ၣ် ကြၢးဝဲဒီးယဟိဝၤပှၤအုၣ်အသး အတၢ်သူၣ်ထီၣ်တဖၣ် လၢဘၣ်တၢ်သူၣ်ထီၣ်အီၤလၢဟီၣ်ခိၣ်ဒီဘ့ၣ် လၢကနဲၣ်လိဒီးဆီၣ်ထွဲမၤစၢၤ တၢ်စံၣ်တဲၤတဲလီၤတၢ်မၤအဂီၢ်န့ၣ်လီၤ. ပှၤပၢဆှၢတၢ်ကမံးတံာ်န့ၣ် မၤတၢ်ဖဲဝဲၤလီၢ်ခိၣ်သ့ၣ်လၢ နယူယီးကီၢ်စဲၣ်, အမဲရကၤကီၢ်စၢဖှိၣ်အပူၤလီၤ. ဒီးအဝဲသ့ၣ်ပၢဆှၢအံးထွဲကွၢ်ထွဲဝဲ ဝဲၤတြၢ်တဖၣ်အတၢ်ဖံးတၢ်မၤ လၢအိၣ်ဝဲလၢထံကီၢ်အါမးအပူၤလီၤ. ဒ်ဟံၣ်ဖိဃီဖိတဒူၣ်အသိး, ပှၤလၢအမၤတၢ်ဖဲဘ့ၤသ့လးတဖၣ်န့ၣ် ဘၣ်တၢ်ကိးအီၤလၢ ဘ့ၤသ့လးအဟံၣ်ဖိဃီဖိလီၤ. အဝဲသ့ၣ်အိၣ်ဒ်သိးသိး, မၤတၢ်ဒ်သိးသိး, အီၣ်တၢ်ဒ်သိးသိး, ဒီးမၤလိလံာ်စီဆှံဒ်သိးသိးလၢ တၢ်ဃူတၢ်ဖိးအပူၤလီၤ.—စံးထီၣ်ပတြၢၤ ၁၃၃:၁.
ပှၤလၢအမၤတၢ်ဖဲ ဘ့ၤသ့လးတဖၣ်န့ၣ် အသးအိၣ်ဟ့ၣ်လီၤအသးလီၤ. ခရံာ်ဖိပိာ်မုၣ်ဒီးပိာ်ခွါတဖၣ်လၢ အိၣ်လၢဘ့ၤသ့လးကိးဖျၢၣ်ဒဲးအပူၤန့ၣ် ဟ့ၣ်လီၤအသးလၢ ကမၤယွၤအတၢ်ဘၣ်သးလီၤ. အဝဲသ့ၣ်မၤတၢ်လၢယွၤအဘီမုၢ်အဂီၢ်လၢ တၢ်ဆၢကတီၢ်လၢပှဲၤန့ၣ်လီၤ. (မးသဲ ၆:၃၃) အဝဲသ့ၣ် တဒိးန့ၢ်ဘၣ်လါလဲနီတဂၤဘၣ်, ဘၣ်ဆၣ်အဝဲသ့ၣ်ကိးဂၤဒဲး ဘၣ်တၢ်ဟ့ၣ်အီၤ တၢ်အိၣ်တၢ်ဆိးအလီၢ်, တၢ်အီၣ်တၢ်အီ ဒီးကျိၣ်စ့တစဲးလၢ အနီၢ်ကစၢ်တၢ်လၢာ်ဘူၣ်လၢာ်စ့ၤအဂီၢ်လီၤ. ပှၤအိၣ်လၢဘ့ၤသ့လးအပူၤကိးဂၤဒဲးန့ၣ် ဘၣ်တၢ်ဟ့ၣ်လီၤအီၤမူဒါတမံၤမံၤ လၢကမၤတၢ်လၢရူမ့ၢ်ဂ့ၤ, တၢ်ဖီမ့ၤအလီၢ်မ့ၢ်ဂ့ၤ, အီၣ်မ့ၤဒၢးအလီၢ်မ့ၢ်ဂ့ၤ, တၢ်စဲကျံးလံာ်အလီၢ်မ့ၢ်ဂ့ၤ, တၢ်ဆးလံာ်အလီၢ်မ့ၢ်ဂ့ၤ, တၢ်မၤကဆှဲကဆှီတၢ်မ့ၢ်ဂ့ၤ, ပှၤဆှုၣ်တၢ်အလီၢ်မ့ၢ်ဂ့ၤ, တၢ်ကွၢ်ထွဲဘှီဂ့ၤ ထီၣ်က့ၤတၢ်မ့ၢ်ဂ့ၤ, မ့တမ့ၢ် တၢ်မၤအဂၤတဖၣ်လီၤ.
လၢဘ့ၤသ့လးန့ၣ် တၢ်မၤအိၣ်အါမးလၢ တၢ်ဆီၣ်ထွဲမၤစၢၤ တၢ်စံၣ်တဲၤတဲလီၤဘီမုၢ်တၢ်ကစီၣ်အဂီၢ်လီၤ. ဘ့ၤသ့လးကိးဖျၢၣ်ဒဲး အတၢ်တိာ်ပာ်န့ၣ် မ့ၢ်ဝဲဒၣ်လၢကရၤလီၤ လံာ်စီဆှံအတၢ်မ့ၢ်တၢ်တီဆူ ပှၤကိးကလုာ်ဒဲးအအိၣ်လီၤ. အဒိဘရိၣ်ခၠၣ်အဝဲအံၤ ဘၣ်တၢ်ကွဲးအီၤလၢ ပှၤပၢဆှၢတၢ်ကမံးတံာ် အတၢ်ကွၢ်ထွဲအဖီလာ်ဝံၤဒီး ဘၣ်တၢ်ဆှၢအီၤခီဖျိလၢ ခီၣ်ဖၠူထၢၣ်တၢ်ရဲၣ်တၢ်ကျဲၤဆူ ပှၤကွဲးကျိာ်ထံတၢ်အကရူၢ်လၢအကယၤတဖၣ် လၢအိၣ်လၢဟီၣ်ခိၣ်ဒီဘ့ၣ်န့ၣ်လီၤ. ပှၤကွဲးကျိာ်ထံတၢ်တဖၣ်ကွဲးကျိာ်အီၤမ့ၢ်ဝံၤဒီး ဘၣ်တၢ်စဲကျံးထုးထီၣ်အီၤလၢ ဘ့ၤသ့လးအစဲးဖီကဟၣ်လၢ အစဲကျံးလံာ်အလီၢ်တဖၣ်လီၤ. လၢခံကတၢၢ်ဘၣ်တၢ်ဆှၢအီၤဆူ တၢ်အိၣ်ဖှိၣ် ၁၁၀,၀၀၀ ဘျဲၣ်အအိၣ်လီၤ. ဘ့ၤသ့လးအဟံၣ်ဖိဃီဖိတဖၣ်န့ၣ် ဆီၣ်ထွဲမၤစၢၤဝဲ တၢ်သးခုကစီၣ်တၢ်မၤ လၢအမ့ၢ်တၢ်မၤလၢ အရ့ဒိၣ်ကတၢၢ်အံၤန့ၣ်လီၤ.—မၢ်ကူး ၁၃:၁၀.
-
မတၤတဖၣ် မၤတၢ်လၢဘ့ၤသ့လးလဲၣ်. ဒီးပှၤကတဲာ်ကတီၤန့ၢ် အဝဲသ့ၣ်အဂီၢ်တၢ်မနုၤလဲၣ်.
-
ဘ့ၤသ့လးကိးဖျၢၣ်ဒဲးန့ၣ် ဆီၣ်ထွဲမၤစၢၤဝဲ တၢ်မၤလၢအရ့ဒိၣ်မနုၤလဲၣ်.