Nkumbu Betele yamekatuka na ndinga Ebreo, mpe yau zola tuba “Yinzo ya Nzambi.” (Kuyantika 28:17, 19) Nkumbu yango mefuana mpenza samu na kutubila bayinzo yina Bambangi ya Yehova mekubikaka na babuala mingi, bisika bau ketuadisaka mpe bau kebongisaka kisalu ya kusamuna. Kimvuka ya Ntuadisi kesalaka na biro ya nene ya Bambangi ya Yehova yina kele na kizunga ya New York, na États-Unis, mpe banda kuna yau ketuadisaka bisalu ya bafiliale nionso yina kele na bayinsi mingi. Bayina kesalaka na bisika yango mebokudulua bau nionso dibuta ya Betele. Mutindu kaka yau kevuandilaka na dibuta, bampangi ya dibuta ya Betele kevuandaka mpe kesalaka kisika mosi, kekudiaka kisika mosi, kelongukaka Biblia kintuadi na bumosi.​—Nkunga 133:1.

Kisika mosi ya mfunu mingi yina bampangi kekukipesaka na ntima mosi. Na Babetele nionso, bampangi ya babakala mpe ya banketo kekukipesaka mpenza ntangu nionso samu na kusala luzolo ya Nzambi mpe samu na mambu metadila Kimfumu ya Nzambi. (Matayo 6:33) Bau kefutamaka ve, kasi bakepesaka bau nionso kisika ya kuvuanda, madia mpe mua mbongo samu na bansatu na bau ya fiotifioti. Konso muntu na Betele kele na kisalu yina bamepesaka yandi, yalenda vuanda na biro, na kisika ya kulambila, to na kisika bakekudiaka. Bayankaka kesalaka na kisika ya kubimisa to ya kukubika mikanda na masini; bayankaka ketulaka bunkete na masuku, kesukulaka bilele, kebongisaka bamasini, to mambu yankaka.

Kisika kisalu kesalamaka ngolo samu na kusadisa kisalu ya kusamuna Kimfumu kuenda na ntuala. Mfunu ya ntetentete ya Betele yau kele ti kedika ya Biblia kumina bantu mingi mpenza. Na kifuani, mua mukanda yayi nge mesimba yau kena kusadisa bantu mingi bazaba kedika. Yasonamaka na lutuadusu ya Kimvuka ya Ntuadisi, mpe yau tindamaka na nzila ya Internet na bankama ya baekipi ya bambangudi yina kele na yinza mvimba. Yau bimisamaka na bamasini yina kebimisaka mikanda mingi na ntangu ya fioti, yina kele na Babetele yankaka. Na manima, yau tindamaka na bimvuka kuluta 110 000. Dibuta ya Betele kepesaka maboko na bisalu nionso yina, mpe yau kena kusala ti kisalu ya kusamuna nsangu ya mbote yina fueti salama malumalu mpenza yakokisama.​—Marko 13:10.

• Banani kesalaka na Betele, mpe yinki mebongisama samu na bau?

• Yinki kisalu yina fueti salama malumalu bampangi ya Betele mosimosi kepesaka maboko?