ບົດທີ 21
ເບເທນແມ່ນຫຍັງ?
ພະແນກສິລະປະ ສະຫະລັດອາເມຣິກາ
ເຢຍລະມັນ
ເກນຢາ
ໂກລົມບີ
ເບເທນ ຊື່ໃນພາສາເຫບເລີໝາຍຄວາມວ່າ “ວິຫານຂອງພະເຈົ້າ.” (ຕົ້ນເດີມ 28:17, 19) ເບເທນເປັນຊື່ທີ່ເໝາະສົມສຳລັບອາຄານຕ່າງ ໆ ທີ່ພະຍານພະເຢໂຫວາສ້າງຂຶ້ນທົ່ວໂລກ ເຊິ່ງເປັນບ່ອນທີ່ຊີ້ນຳແລະສະໜັບສະໜູນວຽກງານການປະກາດ. ຄະນະກຳມະການປົກຄອງຮັບໃຊ້ຢູ່ສຳນັກງານໃຫຍ່ໃນລັດນິວຢອກ ສະຫະລັດອາເມຣິກາ ແລະຈາກທີ່ນັ້ນຄະນະກຳມະການປົກຄອງໄດ້ເບິ່ງແຍງວຽກງານຂອງສຳນັກງານສາຂາໃນຫຼາຍປະເທດ. ໃນຖານະເປັນກຸ່ມ ຜູ້ທີ່ຮັບໃຊ້ໃນສຳນັກງານສາຂາເຫຼົ່ານີ້ເປັນທີ່ຮູ້ຈັກໃນນາມຄອບຄົວເບເທນ. ຄືກັບຄອບຄົວ ເຂົາເຈົ້າອາໄສແລະເຮັດວຽກຮ່ວມກັນ ກິນເຂົ້ານຳກັນ ແລະສຶກສາຄຳພີໄບເບິນນຳກັນດ້ວຍຄວາມສາມັກຄີ.—ຄຳເພງ 133:1
ເບເທນເປັນບ່ອນພິເສດເຊິ່ງສະມາຊິກຄອບຄົວນັ້ນໄດ້ເສຍສະລະຕົວເອງ. ຢູ່ທຸກ ໆ ເບເທນ ມີຄລິດສະຕຽນຊາຍຍິງເຊິ່ງອຸທິດຕົວທີ່ຈະເຮັດຕາມໃຈປະສົງຂອງພະເຈົ້າແລະຮັບໃຊ້ເຕັມເວລາເພື່ອຜົນປະໂຫຍດຂອງລາຊະອານາຈັກ. (ມັດທາຍ 6:33) ເຂົາເຈົ້າບໍ່ໄດ້ຮັບຄ່າຈ້າງຫຼືເງິນເດືອນ ແຕ່ມີການຈັດຫ້ອງພັກອາໄສພ້ອມດ້ວຍອາຫານແລະເງິນເບ້ຍລ້ຽງໃຫ້ທຸກຄົນເພື່ອຊ່ວຍສຳລັບຄ່າໃຊ້ຈ່າຍສ່ວນຕົວ. ທຸກຄົນຢູ່ເບເທນໄດ້ຮັບມອບໝາຍວຽກໃຫ້ເຮັດ ບໍ່ວ່າຈະເຮັດວຽກຢູ່ໃນຫ້ອງການ ໃນເຮືອນຄົວ ຫຼືໃນຫ້ອງກິນເຂົ້າ. ບາງຄົນເຮັດວຽກໃນພະແນກພິມຫຼືພະແນກຫຍິບປົກປຶ້ມ ຫຼືເຮັດວຽກອະນາໄມ ຊັກເຄື່ອງ ສ້ອມແປງ ຫຼືວຽກອື່ນ ໆ.
ເບເທນເປັນບ່ອນທີ່ມີຫຼາຍໜ້າວຽກເຊິ່ງສະໜັບສະໜູນວຽກງານການປະກາດລາຊະອານາຈັກ. ຈຸດປະສົງຫຼັກຂອງທຸກ ໆ ເບເທນແມ່ນເຮັດໃຫ້ຄວາມຈິງໃນຄຳພີໄບເບິນອອກໄປສູ່ຫຼາຍຄົນເທົ່າທີ່ຈະຫຼາຍໄດ້. ຈຸນລະສານນີ້ເປັນຕົວຢ່າງໜຶ່ງຂອງວຽກງານນັ້ນ. ຈຸນລະສານນີ້ຖືກຂຽນພາຍໃຕ້ການດູແລຂອງຄະນະກຳມະການປົກຄອງ ແລ້ວສົ່ງຜ່ານທາງລະບົບຄອມພິວເຕີໃຫ້ກັບກຸ່ມການແປຫຼາຍຮ້ອຍກຸ່ມທົ່ວໂລກ ຈາກນັ້ນກໍພິມດ້ວຍຈັກພິມທີ່ມີຄວາມໄວສູງໃນໂຮງພິມຫຼາຍແຫ່ງຢູ່ເບເທນ ແລະສົ່ງໄປໃຫ້ຫຼາຍກວ່າ 110.000 ປະຊາຄົມ. ໃນທຸກວຽກງານ ຄອບຄົວເບເທນໃຫ້ການປະກອບສ່ວນທີ່ສຳຄັນຕໍ່ກັບວຽກມອບໝາຍທັງໝົດເຊິ່ງຮີບດ່ວນທີ່ສຸດ ແມ່ນວຽກການປະກາດຂ່າວດີ.—ມາລະໂກ 13:10
-
ໃຜທີ່ຮັບໃຊ້ຢູ່ເບເທນ ແລະມີການເບິ່ງແຍງເຂົາເຈົ້າແນວໃດ?
-
ວຽກຮີບດ່ວນອັນໃດທີ່ໄດ້ຮັບການປະກອບສ່ວນຈາກວຽກງານຂອງແຕ່ລະເບເທນ?
