Ilo kajin Hibru, naan in Betel̦ ej mel̦el̦ein “Im̦õn Anij.” (Jenesis 28:17, 19) Ãt in el̦ap an jejjet im ekkar ñan m̦oko me Ri Kõnnaan ro an Jeova rej kõjerbali ipel̦aakin lal̦ in ñan aer loloorjake im jipañ bwe en wõnm̦aanl̦o̦k wõt jerbal in kwal̦o̦k naan. Kumi Eo me Ej Lale Aolep Eklejia ko an Ri Kõnnaan ro an Jeova rej jerbal ilo opij eo ilo New York ilo Amedka. Eñin ej opij eo el̦ap an Ri Kõnnaan ro an Jeova ipel̦aakin lal̦ in. Jãn ijin, em̦m̦aan rein rej loloorjake aolep jerbal ko me rej wal̦o̦k ilo ra ko ak opij ko jet amim ipel̦aakin lal̦ in. Aolep ro me rej jerbal ilo Betel̦ rej ãinwõt juon baam̦le. Kõn men in, rej jerbal im jokwe ippãn doon. Rej bareinwõt m̦õñã im katak Baibõl̦ ippãn doon ilo bõrokuk.​—Sam 133:1, UBS.

Juon jikin em̦m̦an me aolep rej ãinwõt juon baam̦le im rej m̦õn̦õn̦õ in kaarmejjeteik kõn̦aan ko aer make. Ilo aolep Betel̦ ko ipel̦aakin lal̦ in, em̦m̦aan im kõrã ro ie rej kõjerbale mour ko aer ñan kõm̦anm̦an ankilaan Anij im kõm̦m̦ani aolep jerbal ko ñan Aelõñ eo an Anij. (Matu 6:33) Ejjel̦o̦k juon iaaer ej kõl̦l̦ã. Bõtab, ewõr kijeer im jikin aer jokwe ilo Betel̦. Bareinwõt, ewõr jidik jããn in jipañ rej bõke ñan aer maroñ wiaiki aikuj ko aer make. Aolep ro ilo Betel̦ ewõr aer jerbal. Jet iaaer rej jerbal ilo opij ko, jikin kamat im jikin m̦õñã ko. Bar jet iaaer rej jerbal ilo jikin kõm̦m̦an bok ko. Jet rej bar kõm̦m̦ani jerbal ko ãinwõt karreo im kwal̦kol̦ nuknuk. Bar jet iaaer rej kõjparok m̦õkein bwe ren jab jorrããn im bar kõm̦m̦ani jerbal ko jet.

Juon jikin el̦ap poub ie ñan jipañ bwe en wõnm̦aanl̦o̦k wõt jerbal in kwal̦o̦k naan kõn Aelõñ eo. Unin an wõr Betel̦ ipel̦aakin lal̦ in ej ñan kõm̦m̦an bwe armej otemjej ren jel̦ã kõn katak ko rem̦ool jãn Baibõl̦. Ñan waanjoñak, kar kõm̦m̦ane bok in ilo Betel̦. Kar je aolep katak kein ilo bok in ium̦win tõl eo an kumi eo me ej lale aolep eklejia ko an Ri Kõnnaan ro an Jeova. Ãlikin aer kar je katak kein, rar kõjerbal computer im jilkinl̦o̦k ñan ri ukok ro ilo elõñ kajin ko ipel̦aakin lal̦ in. El̦ak m̦õj aer ukote katak kein, rar print ak kõm̦m̦ani bok in ilo kein jerbal ko rel̦l̦ap ilo jet Betel̦ ko. Ãlikin wõt, rar jilkinl̦o̦k bok in ñan elõñl̦o̦k jãn 110,000 eklejia ko ilo lal̦ in. Jãn kar jinoin kar kõm̦m̦ane bok in ñan jem̦l̦o̦kin, aolep ri jerbal ro ilo Betel̦ rar kõm̦m̦ane ijo kun̦aaer bwe en wõnm̦aanl̦o̦k wõt jerbal in kwal̦o̦k naan kõn Aelõñ eo. Eñin ej jerbal eo eaorõktata.​—Mark 13:10.

• Wõn ro rej jerbal ilo Betel̦ im ewi wãween aer mour?

• Ta jerbal eo aorõktata me ri jerbal ro ilo Betel̦ rej jipañ bwe en wõnm̦aanl̦o̦k wõt?