Уло тӱня мучко Иегован Таныкше-влакын «Вефиль» манме комплекс-влак улыт. Тошто еврей йылме дене «Вефиль» мут «Юмын пӧрт» манмым ончыкта (Тӱҥалтыш 28:17, 19, сноско). Тиде лӱм пешак келшен толеш, молан манаш гын Вефиль-влак таныклыме пашам виктараш чоҥымо улыт. Иегован Таныкше-влакын тӱнямбалысе тӱҥ виктемышт США-ште, Нью-Йорк штатыште верланен. Туштак Вуйлатыше совет шке пашажым шукта. Тушечынак тӱрлӧ эллаште улшо филиал-влакын пашаштым эскерат. Вефильыште илыше-влакым вефильысе еш маныт. Кугу еш семын нуно пырля илат, пашам ыштат, пырля кочкыт да пырля Библийым шымлат (Псалом 132:1).

Кугу еш, кушто кажныже, шкалан пайдам кычалде, шке пашажым шукта. Вефильыште илыше-влак уло жапыштым да вийыштым пуэн, Юмын эрыкым шуктат да Юмын Кугыжаныш верч тыршат (Матфейын 6:33). Пашадарым нуно огыт нал, но кажнылан илыме вер, кочкыш да илыш кӱлешлыкым ситарашлан изирак пособий пуалтеш. Вефилец-влак кокла гыч кажныжым иктаж-могай отделыш пашам ышташ шогалтыме. Иктышт офислаште ыштат, весышт кухньышто але моло вере тыршат. Южышт типографийыште ыштат але пӧлем-влакым эрыктат, вургемым мушкыт, ачалат да моло кӱлешан сомылым шуктат.

Вер, кушто чыланат Кугыжанышын таныклыме пашаж верч тыршат. Кажне Вефильын тӱҥ цельже — шукырак еҥым библийысе чын дене палымым ышташ. Мутлан, тиде брошюрым налаш. Тиде брошюрым возымаште эн ончыч Вуйлатыше совет полшен. Вара англичан йылме дене возымо брошюрым компьютер гоч уло тӱня мучко кусарыше-влаклан колтеныт, вефильысе типографийлаште печатлен луктыныт да 120 000 утла погынымашке колтеныт. Тиде процессын кажне ужашыштыже Вефильыште служитлыше-влак тыршен шогеныт. Тыге нуно эн кӱлешан заданийым таче шукташ полшат — тидыже поро уверым шаркалымаш (Маркын 13:10).

• Вефильыште кӧмыт служитлат да могай окса дене нуно илат?

• Вефиль молан кӱлеш?