Bethel alizina lya ci Heberi lino likasula ukuti “Ing’anda ya kwe Leza.” (Intaliko. 28:17, 19) Lyo-o izina lyayana ni vikulwa vino Inte zya kwe Yehova zikawomvya mu nsi yonsinye ku kutunjilila umulimo wakuwizya ilandwe lizima. Iwumba Lino Likatungulula lyawela ku maofesi makulu yano yawa mu New York ku U.S.A. Wa-a awanawitu awano wakatungulula imilimo yino yikawombwa pa maofesi ya misambo insi yonsinye. Wano wakawombela pa Bethel wakakwitwa ukuti ulupwa lwa Bethel amuno wakakwikala ponga, wakalila ivya kulya ponga, nu kusambilila Baibolo ponga.—Amalumbo 133:1.

Wano wakawombela pe co-o icifulo iciyiwele wayipelesya nkaninye. Pa Bethel pawa Awina Klistu awonsi na wanaci wano wayipelesya ukucita ukulonda kwa kwe Leza swinya wakawomvya impindi yawo yonsinye ku kutunjilila ivya Wufumu. (Mateyu 6:33) Wa-a awantu wasifola lelo wakawapekanizizya umwakwikala, ivya kulya na kandalama vye katici akakuwavwilizyako mwe tumwi tuno wakulonda. Kutawa nanti wenga wino akakwikala vye pa Bethel, wonsinye wawa na kuno wakawombela, wamwi wakawombela mu ma ofesi, wamwi ku kutenda, ne wamwi wakawombela mu muputule wakulilamo. Wanji wakawombela kuno wakapulinta nu kulonga amabuku, wamwi wakazifya mu miputule, wanji wakacapa ivizwalo, wanji wakalunjisya vino vikononeka, ne wanji wakawomba imilimo yinji.

Wano wakawombela pa Bethel wakawombesya sana ukutunjilila umulimo wakuwizya. Cino kwawela vyo-o ivifulo akulenga icisinka ca mu Baibolo ukufika ku wantu wonsinye. Yo-o broshuwa yawa pa mabuku yano yakakwavwa wantu. Iwumba Lino Likatungulula alino lyalocesyanga pa kulembwa kwe ka-a akabuku, nu kukatuma kwa kapiliwula wano wawa insi yonsinye ukuwomvya kompyuta, wakapulinsile mwe vya mashini vino vikapulinta amabuku amavule mu mpindi intici, nu kukatuma ku mawungwe ya Nte zya kwe Yehova yano yacila 110, 000. Imilimo yonsinye yino awa pa Bethel wakawomba yikatunjilila umulimo wuno wuzipizile ukuwombwa zuwa uwa kuwizya ilandwe lizima.—Marko 13:10.

• Awaweni wano wakawombela pa Bethel, swinya wakawasakamala wuli?

• Amulimo ci wuno wupamvizye sana wuno awa pa Bethel wakatunjilila?