Betel se tokayit itech tajtol hebreo tein kijtosneki “IChan Dios” (Génesis 28:17, 19, nota). Nejin se tokayit tein kuali kinamiki kipiaskej kalmej tein kichijchiuanij itaixpantijkauan Jiova noyampa taltikpak uan kampa motemaka nepaleuil uan moixyekana tanojnotsalis. Oloch Taojtokaltianij, moajsij itech Betel tein yetok itech altepet Nueva York (Estados Unidos), uan ompa kiixyekanaj nochi tekimej tein mochiua itech okseki kalmej Betel tein moajsij itech miak tataman altepemej. Nochin akin tekitij itech nejon kalmej moixmatij kemej kalyetouanij Betel. Ijkon kemej okseki kalyetouanij, sentakuaj, sennemij, sentekitij uan mosenmachtiaj iTajtol Dios (Salmo 133:1).

Se kali kampa nochin akin ompa nemij tekitij ika nochi ininyolo. Itech sejse Betel moajsij takamej uan siuamej akin kipiaj se kuali uikalis iuan Dios uan mojmostaj kitayekanaltiaj kichiuaskej itanejnekilis uan tapaleuiaj maj mochiua itekiyo Jiova (Mateo 6:33). Amo akin kiselia taxtauil, tein kemaj kinmakaj kani mokauaskej uan tein kikuaskej, uan no tepitsin tomin tein ika uelis mopaleuiskej. Nochin kipiaj se tekit tein ika tapaleuiaj: seki itech oficina, kampa takualchiuaj oso kampa kintamakaj; oksekin kampa mochijchiua miak tataman amaixmej; uan oksekin itech tachipaualis, kampa tapakaj, kampa kiitaj maj kuali yeto kali uan okseki tamanok.

Kampa mochiua miak tekit tein tapaleuia maj motanojnotsa ika iTekiuajyo Dios. Tein okachi tayekantok itech sejse Betel yejua maj nochin taltikpakneminij tein uelis maj kiixmatikan tein tamachtia Biblia. Nejin amaix kinextia nejon. Moijkuiloj ika inintaixyekanalis Oloch Taojtokaltianij, kititankej ika computadora noyampa taltikpak kampa tokniuan kikepaj amaixmej itech okse tajtol, mokixtij itech amat ika teposmej tein ijsiujka tekitij itech tataman kalmej Betel uan kititankej itech panoua ciento diez mil nechikolmej. Itech nochi nejin tataman tekimej, nochin kalyetouanij Betel kuali tapaleuiaj maj mochiua tekit tein okachi motelneki: maj moteixmatilti kuali tanauatilmej (Marcos 13:10).

• ¿Akonimej tapaleuiaj itech kali Betel, uan toni nepaleuil kinmakaj?

• ¿Toni tekit tein motelneki tapaleuiaj ika tein mochiua itech sejse kali Betel?