Bethele, e lego leina la Seheberu, e ra gore “Ntlo ya Modimo.” (Genesi 28:17, 19, mongwalo wa ka tlase) Ke leina le le swanetšego la meago yeo Dihlatse tša Jehofa di e hlomilego lefaseng ka bophara yeo modiro wa boboledi o laolwago le go thekgwa gona. Sehlopha se Bušago se hlankela kua New York State, U.S.A., gomme se okamela modiro wa diofisi tša makala dinageng tše dintši se le moo. E le sehlopha, bao ba hlankelago meagong ye ba tsebja e le lapa la Bethele. Ka go swana le lapa, ba a dula e bile ba šoma gotee, ba ja gotee le go ithuta Beibele gotee e le batee.—Psalme 133:1.

Lefelo la moswananoši leo ditho tša lapa di ikgafago go lona. Moagong o mongwe le o mongwe wa Bethele, go na le banna le basadi ba Bakriste bao ba ikgafetšego go dira thato ya Modimo le go hlankela dikgahlego tša Mmušo ka nako e tletšego. (Mateo 6:33) Ga go le o tee wa bona yo a amogelago mogolo goba moputso, eupša ka moka ga bona ba newa madulo le dijo le tšhelete e nyenyane ya go ba thuša go lefelela ditshenyagalelo tša bona. Yo mongwe le yo mongwe Bethele o abetšwe modiro o itšego, e ka ba e le ofising, khitšhing goba phapošing ya go jela. Ba bangwe ba hlankela moagong wa kgatišo goba botlemelong bja dipuku, goba ba hlwekiša diphapoši, ba hlatswa diaparo, ba hlokomela meago goba ba dira dilo tše dingwe.

Lefelo leo go lona go swaregilwego ka go thekga modiro wa go bolela ka Mmušo. Morero o mogolo wa Bethele e nngwe le e nngwe ke go dira gore batho ba bantši ka mo go kgonegago ba hwetše therešo ya Beibele. Poroutšha ye ke mohlala o mongwe wa seo. E ngwadilwe ka tlase ba bookamedi bja Sehlopha se Bušago, ya fetišetšwa dihlopheng tše makgolo tša bofetoledi lefaseng ka moka ka didirišwa tša elektroniki, ya gatišwa metšheneng ya lebelo le legolo mafelong a mmalwa a Bethele a kgatišo ke moka ya romelwa diphuthegong tša ka godimo ga tše 110 000. Dikabelong tše ka moka, magae a Bethele a thekga ka mo go nyakegago modiro o akgofilego go feta e mengwe ka moka—wa go bolela ditaba tše dibotse.—Mareka 13:10.

• Ke bomang bao ba hlankelago Bethele, gomme ba hlokomelwa bjang?

• Ke modiro ofe o akgofilego wo o thekgwago ka seo se dirwago Bethele e nngwe le e nngwe?