Béthel, Hííbrew kʼehjí “Diyin God bighan” jiníigo óolyé. (Genesis 28:17, 19) Jiihóvah Yá Dahalneʼé kin biiʼ daʼáníishgo nidayiiznilígíí Béthel bee biʼdójí. Áko éí áádę́ę́ʼ nahaneʼ yáʼátʼéehii yikʼidadéezʼı̨́įʼgo deiyíłyeed dóó yikééʼ naazı̨́įgo yideiyílníísh. Hastóí Alą́ąjįʼ Daʼéeʼéshígíí éí U.S.A. Béthel New Yorkgi deiyílníísh, éí ląʼígóó daa kéyah bitsʼádaʼoozʼaʼgóó daʼíníshígi yikʼidadéezʼı̨́ı̨́ʼ. Ákweʼé deiyílníshígíí éí Béthelgi tʼááłaʼ háájéíʼ nahalingo bee béédahoʼdílzin. Ałkʼis dajílı̨́įgo ahił dahaghan dóó nidajilnish, hoł dahózhǫ́ǫgo ahił nídaʼjidı̨́ı̨́h dóó łááʼ ídlíigo Diyin God Bizaad bídahojoołʼaah.​—Psalm 133:1.

Ałkʼis dajílı̨́įgo ákweʼé naʼanish yaa ádaa ádaʼdeestʼą́. Tʼáá ałtsogóó Béthel daʼíníishgi Oodlání danilínígíí God íinízinii yikʼeh ádaaníiłgo yaa ádaʼdeestʼą́, dóó God biNahatʼaʼ alą́ąjįʼ yá deiyílníísh. (Matthew 6:33) Doo éí bichʼįʼ nidaʼazláágóó nidaalnish, ndi danijahgi dóó chʼiyáán bá silá. Áádóó nínádíziʼgo yídį danilínígíí áłchʼı̨́dígo béeso biniyé bee bíkáʼanáʼáwoʼ. Áko díí éí Béthelgi dabighanígíí naaltsoos binaʼanish bá nahazʼání góneʼ, chʼiyáán álʼı̨́ı̨́ góneʼ, doodaiiʼ daʼadą́ą́ góneʼ honaanish dahólǫ́. Łáʼ éí naaltsoos wóltaʼ ádaalneʼ dóó ahiih dahaʼnííł góneʼ nidaalnish. Áádóó łaʼ hashtʼe dahałʼı̨́, daʼiigis, nidaʼiichxǫǫhgóó hashtʼéii daʼalʼı̨́, doodaiiʼ naanish nááná łah baa dahiditʼaah.

God biNahatʼaʼ baa nahaneʼígíí yikééʼ naazı̨́įgo yideiyílníísh. Daa Béthelgóó bá áhátʼínígíí éí Diyin God Bizaad tʼááʼaaníigo baa haneʼígíí diné yaa dahodidootsʼı̨́ı̨́ł biniyé. Díí naaltsoos yíníltaʼígíí ákótʼéego ályaa. Éí Hastóí Alą́ąjįʼ Daʼéeʼéshígíí yikʼidadéezʼı̨́įʼgo bikʼeʼashchı̨́. Nidahoneesʼą́ą́góó ląʼí neeznádiingo ataʼ dahalneʼé, atsiniltłʼish yee ndaalnishígíí bee bichʼįʼ ádaalneʼ. Éí łaʼ daa Béthelgóó naaltsoos yéédaʼadleʼgo tsxı̨́įłgo deiílyeedígíí bee bikááʼdóó béédaʼalneʼ, éí bikééʼdóó 110,000 dóó baʼaan áłah nídaʼadleehgóó bichʼįʼ ádaalneʼ. Tʼáá átʼé daa Béthelgi bidaʼóoníshígíí éí haneʼ yáʼátʼéehii baa nahodoonih íiyisíí yiniyé ádaatʼı̨́įgo yikééʼ naazı̨́.​—Mark 13:10.

• Háíshąʼ éí Béthelgi nidaalnish, dóó haitʼéego baa ádahayą́?

• Béthel danínilgóó haʼátʼíísh íiyisíí biʼoonishígíí yikééʼ naazı̨́?