Bɛtɛle le Hibulu duma, mɔɔ ɔ bo kile “Nyamenle Sua Nu.” (Gyɛnɛsese 28:17, 19, ɔbodwɛkɛ) Ɔle duma mɔɔ fɛta azua ngakyile mɔɔ Gyihova Alasevolɛ ɛzi ye wɔ ewiade amuala na bɛfa edwɛkɛhanlɛ ne anwo adehilelɛ nee moalɛ bɛmaa wɔ ɛkɛ la. Neazo Eku ne sonle wɔ ewiade amuala gyima ne ati mɔɔ wɔ New York State, U.S.A. la, ɛkɛ ne a bɛwɔ na bɛnea ɔfese mɔɔ wɔ maanle ngakyile nu la gyimayɛlɛ zo a. Bɛfɛlɛ menli mɔɔ bɔ nu yɛ gyima wɔ ɛleka ɛhye mɔ la kɛ Bɛtɛle abusua. Bɛde ɛleka ko yɛɛ bɛyɛ gyima bɛbɔ nu, bɛdi aleɛ bɛbɔ nu yɛɛ bɛbɔ nu bɛsukoa Baebolo ne kɛ abusua.​—Edwɛne 133:1.

Ɔle ɛleka titili mɔɔ abusua ne anu amra tu bɛ nwo maa a. Kilisiene mrenyia nee mraalɛ mɔɔ bɛlɛyɛ Nyamenle ɛhulolɛdeɛ na bɛlɛfa bɛ mekɛ kɔsɔɔti bɛayɛ Belemgbunlililɛ gyima ne la a wɔ Bɛtɛle biala anu a. (Mateyu 6:33) Bɛndua bɛ kakɛ, noko bɛmaa bɛ kɔsɔɔti sua nee aleɛ yɛɛ ezukoa ekyi mɔɔ bɛfa bɛtua kakɛ mɔɔ bɛkɛbɔ la a. Awie biala mɔɔ wɔ Bɛtɛle la lɛ gyima mɔɔ ɔyɛ a, bie mɔ yɛ gyima wɔ ɔfese, egyaade anzɛɛ ɛleka mɔɔ bɛdi aleɛ la. Bie mɔ yɛ gyima wɔ ɛleka mɔɔ bɛyɛ mbuluku la, bie mɔ siezie sua nu, bie mɔ kpo ninyɛne, bie mɔ siezie ninyɛne mɔɔ ɛzɛkye la anzɛɛ bɛyɛ ninyɛne gyɛne.

Ɔle ɛleka mɔɔ bɛyɛ gyima dahuu bɛfa bɛboa Belemgbunlililɛ nolobɔlɛ gyima ne. Bɛtɛle biala bodane titili a le kɛ bɛmaa menli dɔɔnwo anwu Baebolo ne anu nɔhalɛ ne. Nwolɛ neazo ko a le brohyua ɛhye. Neazo Eku ne a nleanle maanle bɛhɛlɛle na bɛvale bɛhɔmanle menli dɔɔnwo mɔɔ bahile ɔ bo wɔ ewiade amuala la, bɛvale milahyinli mɔɔ yɛ mbuluku ndɛndɛ wɔ Bɛtɛle bie mɔ anu la bɛyɛle na bɛvale bɛhɔle asafo mɔɔ bo 120,000 la anu. Wɔ ɛhye mɔ biala ɛyɛlɛ nu, Bɛtɛle mbusua ne fa moalɛ mɔɔ hyia la maa wɔ gyima mɔɔ hyia ndɛndɛ tɛla biala la ɛyɛlɛ nu​—edwɛkpa ne nolobɔlɛ ne.​—Maake 13:10.

• Nwane mɔ a sonle wɔ Bɛtɛle a, na kɛzi bɛnea bɛ ɛ?

• Gyima mɔɔ hyia ndɛndɛ la boni a Bɛtɛle gyima ne boa ye ɛyɛlɛ a?