Bethel is en Hebrew nohma un maynd, “Haus Funn Gott.” (1 Mosi 28:17, 19) Sell is en goodah nohma fa awl di bletz es Jehova Sei Witnesses henn gans ivvah di veld. Dess is vo direction un support kumd fa di ministry. Di Drubb es Foahgayt is in di United States Bethel in New York, un funn datt sayna si ivvah awl di eahvet es gedu vatt in branch offices in feel diffandi countries. Awl selli es in Bethel shaffa sinn di Bethel family kaysa. Yusht vi en family, si voona, shaffa, essa, un shtodya di Bivvel mitt-nannah.​—Psalm 133:1.

En speshelah blatz vo breedah un shveshtra geahn shaffa fa anri. An alli Bethel, sinn’s mansleit un veibsleit es iahra besht gevva fa Jehova sei villa du un si shaffa full-time datt. (Matthäus 6:33) Nimmand vatt betzawld, avvah alli-ebbah grikt ess-sach un en blatz fa voona. Alli moonet greeya si awl samm geld fa helfa mitt iahra aykni expenses. Alli-ebbah an Bethel hott en assignment, fleicht in en office, di kich, adda in di dining room. Dayl shaffa vo’s shtoft geprind vatt adda vo di bichah gmacht vadda. Dayl helfa mitt’s butzes, adda helfa glaydah vesha un bikla. Un, anri helfa mitt maintenance, adda anri sacha.

’Sis en bissiyah blatz es di ministry support. Da goal funn alli Bethel is fa macha es so feel leit es possible di voahret heahra kenna funn di Bivvel. Deah brochure is ay example funn sell. Eah voah ivvah ksenna bei di Drubb es Foahgayt vann eah kshrivva vadda is. No, is eah naus kshikt vadda zu hunnahts funn trenslayshin teams gans ivvah di veld, voah geprind uf high-speed presses in edlichi diffandi Bethels, un is naus kshikt vadda zu ivvah 120,000 congregations. Deich awl dess, doon selli in Bethel di mensht importand eahvet supporda​—di goodi sacha breddicha veyyich’s Reich.​—Markus 13:10.

• Veah shaft an Bethel, un vi vadda si acht gevva druff?

• Vass fa importandi eahvet dutt alli Bethel supporda?