سبق 21
بیتایل کیہہ اے؟
امریکہ وچ تصویراں بناؤن والا شعبہ
جرمنی
کینیا
کولمبیا
عبرانی زبان دے لفظ بیتایل دا مطلب اے خدا دا گھر۔ (پیدایش 28:17، 19) دُنیا بھر وچ یہوواہ دے گواہواں دے دفتراں نُوں بیتایل کہیا جاندا اے تے ایہناں دے ذریعے منادی دے کم لئی رہنمائی دِتی جاندی اے۔ گورننگ باڈی ساڈے ہیڈکوارٹر وچ خدمت کردی اے جیہڑا امریکہ وچ اے تے ایتھوں ای اوہ بوہت سارے مُلکاں وچ ساڈیاں برانچاں دی نگرانی کردی اے۔ بیتایل وچ خدمت کرن والے اِک خاندان وانگوں رَل مِل کے رہندے، کھاندے پیندے، کم کردے تے پاک کلام وچوں سکھدے نیں۔—زبور 133:1۔
ایسی جگہ جِتھے سارے دل لا کے خدمت کردے نیں۔ بیتایل وچ کم کرن والے بڑی لگن نال خدا دی مرضی تے چلدے نیں۔ اوہ اپنا سارا وقت بادشاہی نال جُڑے کماں وچ صرف کردے نیں۔ (متی 6:33) اوہناں نُوں تنخواہ نئیں مِلدی پر رہن لئی کمرہ، کھانا تے کجھ جیب خرچ مِلدا اے۔ بیتایلوچ ساریاں نُوں کوئی نہ کوئی ذمےداری دِتی جاندی اے جیویںکہ کجھ بھین بھرا دفتر یاں کچن چ کم کردے نیں۔ جد کہ کئی کتاباں چھاپن، کپڑے دھون، صفائی تے مرمت وغیرہ دا کم کردے نیں۔
ایسی جگہ جِتھے بادشاہی دی خوشخبری پھیلاؤن لئی کم کیتا جاندا اے۔ بیتایل دا اصل مقصد پاک کلام دیاں سچائیاں نُوں زیادہ توں زیادہ لوکاں تک پہنچاؤنا اے۔ مثال لئی ایس کتاب نُوں ای ویکھو جیہڑی تواڈے ہتھ وچ اے۔ ایہہ کتاب گورننگ باڈی دی نگرانی وچ لکھی گئی۔ فیر ایہنوں کمپیوٹر دے ذریعے دُنیا بھر وچ ترجمہ کرن والیاں کئی ٹیماں نُوں گھلیا گیا تاکہ ایہدا فرق فرق زباناں وچ ترجمہ کیتا جاوے۔ ایہدے بعد تیز رفتار مشیناں دے ذریعے ایہنوں چھاپ کے اِک لکھ دس ہزار توں زیادہ کلیسیاواں نُوں گھلیا گیا۔ کتاباں تے رسالیاں نُوں لوکاں تک پہنچاؤن لئی بیتایل دا اِک اِک جی بڑی محنت کردا اے۔ ایس طرحاں بادشاہی دی خوشخبری سناؤن دا کم ودھدا پُھلدا اے تے لوکاں نُوں اپنی جان بچاؤن دا موقع مِلدا اے۔—مرقس 13:10۔
-
بیتایل وچ کون کم کردے نیں تے اوہناں دی دیکھ بھال کیویں کیتی جاندی اے؟
-
بیتایل دے ذریعے کیہڑا ضروری کم کیتا جاندا اے؟