Betelqa hebrëu idiömachö “Diospa Wayin” ninanmi (Genesis 28:17, 19). Kë jutiqa alläpa allim Testïgukunapa entëru Patsachö këkaq jatusaq oficïnäkunapaq, tsëpitam Diospita yachatsikïta dirigiyämun y yanapakayämun. Jehoväpa Testïgunkunata Pushaqkunaqa këkäyan Nueva York (Estädus Unïduschö) markachömi y tsëpitam rikäyämun atska nacionkunachö sucursalkuna rurayanqanta. Tsëchö llapan trabajaq cristiänukunatam familia Betel nir reqiyä. Juk familianöllam llapankuna juntu mikuyan, täräyan, trabajayan y Bibliata estudiayan (Salmu 133:1).

Tsëchöqa llapankunam Jehoväpaq allipa trabajayan. Kë Betel wayikunachöqa ollqupis warmipis Diospa kaqchö alli poqushqa llapan tiempunkunawan Diosta sirweq cristiänukunam kayan, y Diospa Gobiernumpita willakï më tsëman chänampaqmi yanapakuyan (Mateu 6:33). Tsëchö trabajaqkunaqa manam suelduta chaskiyantsu, peru cuartunkuna y mikïninkunaqa qoyanmi, y gastunkunapaqpis ichik qellëwan yanapayanmi. Cada ünutam juk trabäjuman churayan, wakintam oficïnakunaman, cocïnaman, comedorman, y wakintanam imprimiyanqan y encuadernayanqan trabäjukunaman, wakinkunatanam cuartukuna limpiëman, taqshapakïman, y tsë wayichö imëka rurëkunamampis.

Diospa Gobiernumpita yachatsikuyänampaqmi tsëchöqa trabajayan. Betel wayikunachö trabäjuqa yanapakun Bibliapita yachatsikï pï mëman mas chänampaqmi. Tsëtam kë follëtupa yachatsikïnimpis rikätsikun. Jehoväpa Testïgunkunata Pushaqkunam kë follëtuta qellqatsiyämushqa, y computadöratam utilisäyan entëru Patsachö juk idiömaman tikratseqkunaman apatsiyänampaq, y tsënöpam atska nacionchö imprimeq sucursalkuna ras jorqarayämun y tsëpitanam 110.000 congregacionkunapitapis masman apatsiyan. Tsë llapan trabäjukunachömi familia Betelqa allipa yanapakuyan entëru Patsaman Diospa yachatsikïnin mas chänampaq (Marcus 13:10).

• ¿Pikunata Betelchö trabajayan y imawantaq pëkunata yanapayan?

• ¿Ima precisaq rurëchötaq yanapakïkäyan Betelchö trabajaqkunaqa?