Betel can suj suti ima hebreopi niyta munan «Yáyap huasin» (Génesis 28:17, 19, nota). Cay suj alli suti can oficináspaj ima Jehóvap testigusnin túcuy mundupi apincu, maymanta predicaciunta dirigincu y apoyancu. Grupu Supervisajcuna Betelpi Estados Unidosmanta siruincu, Nueva Yorkpi, chayllamanta sucursalestas ashca paisesmanta y túcuy chaypi ’ruasckancuta supervisancu. Túcuy cá huauckesta ima chaypi llamcancu familia Betel ina ’rejsisckas cancu. Suj familia ina, cuscas causancu, micuncu, llamcancu y cuscayasckas Bibliát estudiancu (Salmo 133:1).

Suj súmaj lugar maypi tucuycuna suj familia ina y esfuersuan llamcancu. Sapa Betelpi huauckes y panas espirituales siruishcancu túcuy tiempu Yaya munasckanta ’ruáypaj y predicaciunpi yanapáypaj (Mateo 6:33). Ni pipas paycunamanta suj sueldu o suj salariu chasquincu, pero apincu maypi causayta, micúypaj y suj subsidiu precisasckancupi gastanancúpaj. Sapa suj, suj llámcay apin: huaquin llamcancu oficinaspi, yanuncu, pichancu o ropasta tajsancu, y túcuy allít tianánpaj yanapancu.

Suj lugar maypi ashcát llamcacun Reinu predicacunánpaj. Túcuy llamcajcuna Betelpi llamcancu astaan persunasta verdata Bibliamanta ’rejsinancunápaj. Cá folletu suj ejemplu can. Grupu Supervisajcuna supervisara túcuy imát cá folletupi escribicora, chaymantá, cá folletu traducejcunata túcuy mundumanta internetraycu cachapucorancu, imprimicuncu maquinasuan huaquin paisesmanta y cachancu astaan 115.000 congregaciunesman. Sapa partepi cá publicacionesta ’ruáypaj, huauckes Betelmanta yanapaynincuta ckoncu, astaan urgente llamcaypi: alli noticias predicáypaj (Marcos 13:10).

• ¿Picunas Betelpi siruincu, imát ckocuncu?

• Betelpi ’ruacusckanmanta, ¿ima astaan urgente llamcaypi yanapancu?