Betel nishca hebreo shimiiga, nisha ninmi: “Diospa huasi” (Génesis 28:​17, 19). Intiru mundui Betel nishca Jehovahuaj testigoguna oficinaguna tian. Cai oficinagunamanda yanapanaunmi imasna Diospa Shimira ali rimangahua. Jehovahuaj Testigogunara Cuiraj Muntunga, Estados Unidos llactai tiaj Betelbi tarbarianun. Chimanda tucui oficinagunai ali tarbanuchu yanapanun. Betelbi causajcunaga aillu cuinta paiguna parijulla micunun, tarbanun, Bibliara estudianumbas (2 Corintios 13:​11).

Betelbi ajcuna tucui shunguhua tarbanun. Caran Betelgunai cariuna, huarmiuna tian. Paigunaga ashca huatauna Diosta sirvijcuna anun. Paigunaga tucui punzha Diospa munai pactarichu tarbarianun (Mateo 6:33). Paigunara mana paganunzhu, shinajpis micunara, maibi puñunara cunun. Astaumbas paiguna ministishcaunara randingahua yanapanun. Tucuiguna imaibi tarbanara charinun: oficinagunai, yanununai, quillcauna llucchina maquinagunais, shinallara pichasha, tacsasha, maican ministirishcaunais tarbarianun.

Betelbi ajcuna Diospa Mandanamanda rimangahua yanapanun. Betelbi tiajcunaga munanunmi tucui runauna Diospa Shimira uyanuchu. Cai folletoga shinami ricuchin. Jehovahuaj Testigogunara Cuiraj Muntun cai folleto ali quillcashca saquirichu ricunuca. Huashaga ashca llactaunama computadoragunai cachanuca shujta shimi pasachingahua. Chi huasha atun maquinagunai uctalla copiasha, 110.000 yali tandarijcunama casna folletogunara cachanuca. Betelbi tucui tarbashcaunaga yanapanmi Diospa Shimi intiru mundui mas yachachishca tucuchu (Marcos 13:10).

• Betelbiga ¿piguna sirvinun, shinallara imara chasquinun?

• ¿Imara rurangahua Betelbi yanapanun?