Hebreo rimaypi Betel ninanqa “Diospa wasin” ninanmi (Genesis 28:17, 19). Chay sutiqa allinmi Jehová Diospa testigonkunapa Allpantinpi oficinankuta Betelwan sutichanapaq, chay oficinakunamantam tanteanku Diosmanta willakuy imayna apakunanpaq. Diospa Llaqtanpi Punta Apaqkunaqa Nueva York (Estados Unidos) llaqtapim tarikunku, chay kasqanku oficinamantam paykunaqa achka nacionkunapi Betel wasikunamanta cuentallikunku. Chay wasikunapi oficinakunapi llamkaqkunatam ninchik Betel wasipi yanapakuqkuna nispa. Paykunaqa ayllu hinam kanku; kuskam mikunku, llamkanku, Diospa Palabrantapas estudianku (Salmo 133:1).

Tukuy sonqowan llamkanapaq sumaq sitiom. Sapa Betel wasipim iñiyninkupi suni takyasqa warmi-qarikuna tukuy tiemponkuwan kallpanchakunku Diospa munayninmantawan Gobiernonmanta willasqa kananpaq yanapakuypi (Mateo 6:33). Manam qollqepaqchu llamkanku, ichaqa llapankupaqmi kan mikunanku hinaspa puñunankupas, chaskinkutaqmi gastochankupaq yanapakuytapas. Sapa yanapakuqmi yachan imapi llamkananta: wakinmi oficinapi, cocinapi, mikuy haywaypi; wakintaq maquinakunawan qellqakuna ruraypi; hukkunañataq cuartokuna limpiaypi, pacha taqsaypi hinaspa imakunapas allichaypi.

Diospa Gobiernonmanta willakuypi yanapaq ancha llamkanapaq sitiom. Betel wasikunaqa Bibliamanta cheqap yachachikuykuna lliw runakunaman chayananpaqmi sapaqchasqa kachkan. Kay folletotapas chaypaqmi rurakurqa. Diospa Llaqtanpi Punta Apaqkunam qellqachirqaku hinaspam qellqakunata utqaylla ruraq maquinakunawan achka nacionkunapi rurachirqaku chaynataq allpantinpi 110.000 masnin congregacionkunaman apachirqaku. Chay ruraykunawanmi Betel wasipi llamkaqkunaqa Diosmanta allin noticiakunata willakunapaq astawanraq yanapakunku (Marcos 13:10).

• ¿Pikunam Betel wasipi yanapakunku hinaspa imayna yanapakuytam chaskinku?

• ¿Ima rurayninchiktam astawan kallpanchan Betel wasikunapi tukuy ima rurasqanku?