O betel hin hebrejsko lav, so znameňinel Devleskero kher. (1. Mojžišova 28:17, 19) Pal calo svetos amen hin khera, so pes vičinen beteli, bo odarig pes dodikhel a podporinel e zvestovaťeľsko služba. O phrala, so ľidžan amari organizacija, služinen andro betel, so hin andro americko štatos New York. On pes starinen pal savore beteli pro svetos. Fameľija betel pes phenel olenge, so keren buťi andro dojekh betel. Avka, sar andre lačhi fameľija, the on dživen, keren buťi, chan a študinen e Biblija sar o phrala the pheňa, so pes rado dikhen. (Žalm 133:1)

Šukar than, kaj sako kerel buťi cale jileha. Andro betel keren buťi o phrala the o pheňa, so kamen le Devles a služinen prekal o kraľišagos cale časoha. (Matúš 6:33) Ňiko lendar na chudel viplata, ale sakones hin, kaj te sovel, so te chal a chuden ča varesavo prispevkos pre oda, so mek lenge kampel te cinel. Sakoneske phenen, so kerela andre kancelarija, kuchňa, jedalňa, pračovňa, udržba, tlačjarňa, ode, kaj pes keren o kňižki the časopisi a vareko pratinel abo kerel vareso aver.

Kerel pes ode but buťi, kaj pes te podporinel e zvestovaťeľsko služba. O beteli pomožinen, kaj pes so nekbuter manuša te dodžanen o biblicko čačipen. Kadi brožura avka sas kerďi thiš. O phrala, so ľidžan amari organizacija, sas paš ada, sar pes pisinelas kadi brožura, sas prekal o počitačis bičhaďi pal calo svetos le phralenge, so prethoven e literatura andre aver čhiba. Kadi brožura sas vitlačimen a bičhaďi andro buter sar 110 000 zbori. E fameľija betel podporinel amari nekbareder buťi: te zvestinel e lačhi sprava. (Marek 13:10)

• Ko služinel andro betel a sar hin pal lende postarimen?

• Savi buťi o betel igen podporinel?