A Hebrew wortu Betel wani taki „oso fu Gado” (Genesis 28:17, 19). A nen disi fiti gi den Betel gebow di Yehovah Kotoigi abi na heri grontapu. Drape den e orga sani gi a preikiwroko èn den e sorgu gi sani di de fanowdu fu du a wroko disi. A Tiri Skin e dini na a edekantoro na New York, Amerkankondre. Den e luku a wroko fu den furu bijkantoro na ini difrenti kondre. Wi e kari den sma di e dini na Betel, a Betelfamiri. Neleki wan osofamiri den e libi na wán presi, den e wroko makandra, den e nyan nanga makandra, èn den e studeri Bijbel nanga makandra.—Psalm 133:1.

Wan aparti presi pe den memre di de leki wán osofamiri de klariklari fu gi densrefi. Na ibri Betel, yu abi Kresten man nanga uma di e gi densrefi fu du a wani fu Gado èn den abi leki wroko fu sorgu gi Kownukondre afersi (Mateyus 6:33). Nowan fu den e kisi pai gi a wroko di den e du, ma den alamala e kisi wan presi fu tan èn nyanyan. Boiti dati den e kisi pikinso moni fu pai gi wan tu sani di den abi fanowdu. Ala sma na Betel e kisi wan wroko fu du, èn dati kan de wan wroko na kantoro, na kukru, noso na a presi pe den e nyan. Trawan e wroko na presi pe den e druk noso meki buku, den e krin kamra, den e wasi krosi, den e ondrow sani, noso den e du wan tra wroko.

Wan presi pe sma e du furu fu horibaka gi a Kownukondre preikiwroko. A moro prenspari sani na ibri Betel na fu pruberi fu meki ala sma kon sabi den tru tori fu Bijbel. Den e du disi fu eksempre nanga a brochure disi. A Tiri Skin ben sorgu taki a brochure skrifi, èn baka dati den seni en nanga yepi fu computer go na hondrohondro grupu sma di e du vertaalwroko na heri grontapu. Dan den e druk en nanga kefalek masyin na den difrenti Betel èn seni en go na moro leki 110.000 gemeente. Ala den sani disi di a Betelfamiri e du na fu horibaka gi a moro prenspari wroko di de, èn dati na fu preiki a bun nyunsu.—Markus 13:10.

• Suma e dini na Betel, èn san den e kisi?

• Gi sortu prenspari wroko ibri Betel e horibaka?