Inja i iti i ken zwa Heberu i Betel la ér “Iyou i Aôndo.” (Genese 28:17, 19) Iti ne kuma sha iyaav mbi Mbashiada mba Yehova ve maa ajiir kposo kposo sha tar, ape i tesen er a eren tom u pasen kwagh, shi i eren akaa a suen u kpaa la. Mbahemenev mba Shin Itine mba eren tom ken afishi a shin itine, a a lu ken kpentar u New York, ken tar u Amerika la shi mba nengen sha tom u i eren sha ubranci asev ken ityar kposo kposo la. Hanma branci yô, mba ve eren tom her la mba yer ve ér tsombor u Betel. Mba tse hen iyaagh i môm, mba eren tom her, shi mba ye kwaghyan shi mba henen Bibilo imôngo, er ka tsombor môm nahan.—Pasalmi 133:1.

Ka ijiir i injaa i mba ve lu tsombor u Betel la ve ne ayol a ve u eren tom yô. Hen hanma iyaagh ki Betel cii yô, nomso man kasev mba civir Aôndo mba her, mba ve eren ishima i Aôndo sha gbashima, shi ve eren tom hanma shighe sha ci u mzehemen u tom u Tartor u Aôndo yô. (Mateu 6:33) Mba kimbin mô ve sha uwer ga, kpa hanma ve yô, nan ngu a iyou, shi ka i na nan kwaghyan shi i na nan iwasen sha annyar kpuaa sha er nana kure mbamgbe mba nan mba hange hange yô. Hanma or u hen Betel yô, nan ngu a tom u i ne nan yô, mbagenev i na ve tom u ken afishi shin tom u shin kicin gayô tom u shin iyou i yan kwaghyan. Mbagenev mba eren tom hen ijiir i gberen ityakerada shin i wan ityakerada igbende shin tom u esen ayou shin u kiren akondo, gayô u sôron iyaagh shin ityom igen.

Ka ijiir i i eren tom kpoghuloo sha u suen tom u pasen kwagh u Tartor yô. Ityôkyaa i vesen i í ver iyaav mbi Betel yô, ka sha u wasen ior kpishi er se fetyô la, sha u ve fa mimi u Bibilo yô. Antakerada ne kpa ka hen iyaagh ki Betel i gber un ye, sha ci u ityôkyaa ne. Ka Mbahemenev Mba Shin Itine ve nenge sha tom u ngeren antakerada ne ye. Yange mba ngeren u mba been yô, ve tindi a u sha Intanet hen ior asev mba geman kwagh sha ajiir kposo kposo sha tar. Mba gem u mba been yô, i gber u sha akeke a gberen ityakerada fele fele ken iyaav mbi Betel mbi i gberen ityakerada her la, shi i tindi a mi hen atôônanongo a hemban 100,000. Tom u icombor i Betel i eren ne cii ngu suen tom u pasen loho u dedoo, u ú hembe lun hange hange cii ne.—Marku 13:10.

• Ka unô ve eren tom shin Betel, man ka i nenge sha ugbayol vev nena?

• Ka tom u hange hange u nyi hanma iyagh ki Betel ki wasen u erene?