«Бейтел» еврей дилинден терҗиме эдиленде «Худайың өйи» диймеги аңладяр (Гелип чыкыш 28:17, 19). Бу өрән ерликли дакылан ат, чүнки олар Ехованың Шаятларына вагыз ишини голдамага ве оңа ёлбашчылык этмәге ярдам эдйәрлер. Бейтел бүтин ер йүзүнде бар. Ёлбашчылык маслахатының бүтиндүнйә баш эдарасы АБШ-ның Нью-Йорк штатында ерлешйәр. Ол әхли юртдакы филиаллара гөзегчилик эдйәр. Бейтелде гуллук эдйән доган-уялар Бейтелиң машгала агзалары хасапланяр. Бу улы агзыбир машгаланың агзалары биле яшаярлар, зәхмет чекйәрлер, биле нахарланярлар ве Мукаддес Язгылары өвренйәрлер (Зебур 133:1).

Мейлетин зәхмет чекйән аҗайып машгала. Бейтелиң агзалары Худайың ислегини ерине етирмәге ве Патышалык ишини голдамага бар вагтыны хем гүйҗүни сарп эдйәрлер (Матта 6:33). Олара хак төленилмейәр, эмма яшамак үчин отаг ве иймит билен үпҗүн эдилйәр хем-де өзлерине герек затлары алмак үчин биразрак пул берилйәр. Бейтелиң агзалары дүрли бөлүмлерде гуллук эдйәрлер. Оларың кәбири офисде, кәбири нахарханада ишлейәрлер. Кәбирлери болса чап эдилйән бөлүмлерде я-да сахыпалары бири-бирине беркидйән энҗамларың башында ишлейәрлер. Доган-уяларың кәбири болса, арассачылык ишине гатнашярлар, эгин-эшик ювярлар, уссачылык эдйәрлер ве шуңа меңзеш ваҗып ишлери ерине етирйәрлер.

Вагыз ишини голдаян ер. Бейтел гуллугының эсасы максады — Мукаддес Язгылардакы хакыкаты әхли адамлара етирмек. Муңа шу брошюра мысал болуп билер. Бу брошюра Ёлбашчылык маслахатының гөркезмеси билен язылды. Соңра ол электрон гөрнүшинде бүтин дүнйәдәки терҗимечилик топарларының көпүсине уградылды ве бирнәче Бейтел чапханаларының ёкары хилли энҗамларында чап эдилди хем-де 110 мүңден говрак йыгнаклара пайланылды. Бейтелиң хер бир агзасы бу ишлере ыхласлы гатнашярлар. Шейлеликде, олар иң ваҗып юмша, ягны хош хабары вагыз этмек ишине гошант гошярлар (Маркус 13:10).

• Бейтелде кимлер гуллук эдйәр ве олар нәдип яшаярлар?

• Бейтелде нәхили ишлер ерине етирилйәр?