Ko e Pētelí, ko ha hingoa faka-Hepelū ia, ‘oku ‘uhingá ko e “Fale ‘o e ‘Otuá.” (Sēnesi 28:17, 19, fakamatala ‘i lalo) Ko ha hingoa fe‘ungamālie ia ki he ngaahi fale kuo fokotu‘u ‘e he Kau Fakamo‘oni ‘a Sihová takatakai ‘i he māmaní ‘a ia ‘oku tataki mo poupou‘i mei ai ‘a e ngāue fakamalangá. ‘Oku ngāue ‘a e Kulupu Pulé ‘i he ‘ulu‘i ‘apitanga ki he māmaní ‘i he Siteiti Niu ‘Ioké, ‘Amelika, pea ‘oku tokanga‘i mei ai ‘a e ngāue ‘a e ngaahi ‘ōfisi va‘á ‘i he ngaahi fonua lahi. ‘I he tu‘unga ko ha kulupú, ko e fa‘ahinga ‘oku ngāue ‘i he ngaahi fale ko ení ‘oku ‘iloa kinautolu ko e fāmili Pēteli. ‘I he hangē ha fāmilí, ‘oku nau nofo ‘o ngāue fakataha, kai fakataha, pea fā‘ūtaha ‘i hono ako ‘a e Tohi Tapú.​—Saame 133:1.

Ko ha feitu‘u makehe ‘a ia ‘oku foaki atu ai ‘e he ngaahi mēmipa ‘o e fāmilí kinautolu. ‘I he ‘api Pēteli kotoa pē, ‘oku ‘i ai ‘a e kau tangata mo e kau fefine Kalisitiane ‘oku nau lī‘oa atu kinautolu ke fai ‘a e finangalo ‘o e ‘Otuá pea ngāue taimi-kakato ki he ngaahi me‘a ‘o e Pule‘angá. (Mātiu 6:33) ‘Oku ‘ikai ke ma‘u ‘e ha taha ‘o kinautolu ha vahe pe totongi, ka ‘oku ‘oange ki he tokotaha kotoa ‘a e loki mo e me‘akai pea mo ha ki‘i pa‘anga ke tokoni ki he‘enau ngaahi fakamole fakafo‘ituituí. Ko e tokotaha kotoa ‘i he Pētelí ‘oku ‘i ai ‘ene ngāue, pe ‘i ha ‘ōfisi, ‘i ha peito, pe ‘i ha loki kai. ‘Oku ngāue ‘a e ni‘ihi ‘i ha fale pulusi pe ‘i ha tafa‘aki takafi tohi, pe fakamaau fale, fō, tauhi ‘a e ‘apí, pe ko e ngaahi me‘a kehe.

Ko ha feitu‘u femo‘uekina ‘oku poupou‘i ai ‘a e malanga‘i ‘o e Pule‘angá. Ko e taumu‘a tefito ‘a e Pēteli kotoa pē ke ‘ai ke ala ma‘u ‘a e mo‘oni Fakatohitapú ‘e he kakai tokolahi taha ‘e ala lavá. Ko e polosiua ko ení ko ha fakatātā ia ‘e taha ‘o e me‘a ko iá. Na‘e hiki ia ‘i he malumalu ‘o e tataki ‘a e Kulupu Pulé, ‘ave faka‘ilekitulōnika ki he ngaahi timi liliu lea ‘e lauingeau takatakai ‘i he māmaní, pulusi ‘i he ngaahi mīsini pulusi vave ‘i he ngaahi fale pulusi he ngaahi Pēteli ‘e ni‘ihi, pea fakaheka ki he ngaahi fakataha‘anga ‘e 110,000 tupu. Lolotonga ‘a e ngāue kotoa ko ení, ‘oku fai ai ‘e he ngaahi fāmili Pētelí ‘a e poupou ‘oku fiema‘ú ki he ngāue fakavavevave taha ‘i he ngāue kotoa pē​—ko hono malanga‘i ‘a e ongoongo leleí.​—Ma‘ake 13:10.

• Ko hai ‘oku ngāue ‘i Pētelí, pea ko e hā ‘a e ngaahi tokonaki ‘oku fai ma‘anautolú?

• Ko e hā ‘a e ngāue fakavavevave ‘oku poupou‘i ‘e he ngāue ‘i he Pēteli taki taha?