Bbeteli ndizina lyaciHebrayo, lyaamba kuti “N’anda yaLeza.” (Matalikilo 28:17, 19) Ndizina lyeelela kwaamba maanda aBakamboni baJehova ngibalawo munyika yoonse, ooko mulimu wakukambawuka nkuuyendelezegwa. Kabunga Keendelezya kabeleka mumawofesi mapati aali kuNew York State, U.S.A. alimwi balanga-langa milimu iicitwa kumawofesi aamitabi munyika zyiingi. Mbuli mpuli, bakkalaamwi akubelekaamwi, balidaamwi, alubo bayiiyaamwi Bbaibbele kabajisini.​—Intembauzyo 133:1.

Bbeteli mbusena bulaa bantu balipedelede kubeleka. Mumaandaa Bbeteli kuli maKristu baalumi abanakazi ibakalipeda kucita kuyanda kwaLeza akubeleka mumulimu waBwaami waciindi coonse. (Matayo 6:33) Takwe nikuba uumwi uubelekela kujana mali pe, pesi boonse bapegwa ndawu zyakoona, cakulya, alimwi amali nce yakuligwasilizya. Boonse aaBbeteli balaa milimu yakucita, bamwi babelekela mumawofesi, mukkicini, naa mumaanda aakulida. Bamwi babeleka kudinda mabbuku, kusalazya maanda, kuwaca, naa kubeleka imwi milimu.

Mbusena bulazyakucita zyiingi zisumpula mulimu wakukambawuka Bwaami. MaBbeteli oonse akaanzilwa kuti kasimpe kali muBbaibbele kasike kubantu boonse kufumbwa mbukukonzeka. Kabbuku aaka ncitondeezyo camulimu wakuyubununa kasimpe. Nikakali kulembwa kabbuku aaka kakali kulangwa-langwa abaKabunga Keendelezya, mpawo kakatumizigwa kwiinda mumakkompiyuta kubasanduluzi muzisi zyoonse. Kakadindwa amincina iidinda mabbuku miingi muciindi ciniini kumaBbeteli asiyene-siyene. Mpawo kakatumizigwa kumbungano ziinda ku110 000. Mukati kamulimu ooyu, bampuli yaBbeteli balagwasizya mumilimu yoonse iiyandikana kucitwa cakufwambaana mbuli kukambawuka makani mabotu.​—Marko 13:10.

• Mbaani babelekaa Bbeteli, alubo balanganizigwa biyeni?

• Mulimu nzi uuyandikana cakufwambaana usumpulwa amilimu iicitwa aBbeteli imwi ayimwi?