Beseri, ibara ery’Oruheburaniya erimanyisa “Enju ya Ruhanga.” (Okubanza 28:17, 19) Egyo niyo nsonga habwaki ebiikaro byoona okwehinguliriza ensi nambere Abakaiso ba Yahwe basigikirra kukora n’okusagika omulimo gwabu ogw’okutebeza bihairwe ibara eryo. Akatebe akalemi kakorra emirimo yaako ha kitebe kyaitu ekikuru ekisangwa omw’isaza lya New York, omu Amerika, kandi nikasigikirra oku, karolerra emirimo ey’ekorwa omu mataagi ag’Abakaiso ba Yahwe agali omu nsi ezindi. Boona abakora omu mataagi ganu bamanywa nka Ababeseri. Nk’abantu ab’omu ka emu, baikara hamu, bakorra hamu, baliira hamu kandi basomera hamu Ekigambo kya Ruhanga.—Zabuli 133:1.

Ekiikaro nambere osanga abantu abaina omutima ogw’okwefereza. Mu buli Beseri, haliyo abasaija n’abakazi Abakristaayo abehaireyo kukora ebya Ruhanga agonza n’omutima gwabu gwona, kandi nibahereza akasumi koona. (Matayo 6:33) Busaho n’omu hali bo atunga omusaara, baitu boona baheebwa ah’okuraara, ebyokulya, na sente entaitotaito ezibakonyera kwehikyaho ebyetaago byaabu ebindi. Buli omu ha Beseri aina omulimo ogw’akora; abamu bakora omu ofiisi, abandi omu kicumbiro rundi omu kisiika nambere haliirwa ebyokulya. Abamu bakora nambere ebitabu bitererwa, abandi basemeza nambere baraara, kandi abandi bakora nambere boogeza engoye, abandi baba omu kudabiriza, n’emirimo endi nyingi.

Bakora n’amaani kusagika omulimo gw’okutebeza. Ekigendererwa kya buli maka ga Beseri nikyo kurora ngu amananu agali omu Baibuli gahika ha bantu baingi nkoku kirukusoboka. Akatabu kanu kali kamu hali ebyo ebikozesebwa kuhikiriza ekigendererwa ekyo. Akatebe akalemi kakarolerra okuhandiikwa kw’akatabu kanu, kuraba omu intaneeti kasindikwa omu mataagi ag’enyahukana nambere ebitabu bihindurrwa, kaherezebwa omu Beseri ezimu eziteera ebitabu, ha kumalirra kasindikwa omu bitebe ebirukuhingura omu 110,000. Ababeseri bakora n’amaani okusagika omulimo ogw’okutebeza amakuru amarungi.—Marako 13:10.

• Nibaha abahereza ha Beseri, kandi barolerwa bata?

• Emirimo ekorwa ha Beseri esagika mulimo ki omukuru.