«Вефил» деп сөстү бурунгу еврей дылдан очулдурарга «Бурганның бажыңы» дээн (Эге дөс 28:17, 19, немелде тайылбыр). Ол сөс суртаал ажылын деткиир дээш, туттунган бажыңнарның адынга дыка таарымчалыг. Ындыг бажыңнар Иегованың Херечилеринде бүгү делегейде бар. Удуртукчу чөвүлел АКШ-тың Нью-Йорк штадында, делегей чергелиг кол башкарылга черинде турар. Оон янзы-бүрү чурттарда салбырларның ажыл-чорудулгазы хайгаараттынып турар. Вефилде бараалгап турар кижилерни вефилчи өг-бүле дээр. Олар, найыралдыг улуг өг-бүле дег, кады чурттап, ажылдап, чемненип, Библияны өөренип турар (Ырлар 132:1).

Бодунга ажык сүрбейн, өскелерге бараалгап турар кайгамчык өг-бүле. Вефилчилер Чагырганың эрге-ажыынче база Бурганның күзел-соруун күүседиринче бүгү үезин болгаш күжүн үндүрүп турар (Матфей 6:33). Оларның кайызы-даа шалың албайн турар, ынчалза-даа шуптузунга чурттаар өрээлди, аъш-чемни болгаш хуу чарыгдалдарын дуглаар дузаламчы акшаны берип турар. Вефилчи бүрүзү бир-ле килдиске бараалгаар кылдыр томуйлаттынар. Чамдыызы офисте, кухняда азы столоваяда ажылдап турар. Өскелерни типографияга азы ном карттаар цехке, а бир чамдыызын өрээлдер аштаар, хеп чуур, септелге кылыр болгаш оон-даа өске чугула ажылдарны кылырын томуйлап каар.

Бүгү күш Чагырга дугайында суртаал ажылынче чоруп турар. Вефил бүрүзүнүң кол сорулгазы — библейжи алыс шын-биле шупту улусту таныштырарында. Чижээ, бо брошюра дижик. Бо дептер Удуртукчу чөвүлелдиң киржилгези-биле бижиттингеш, бүдүн делегейде чүс-чүс очулга бөлүктеринче электроннуг хевирге чоргустунгаш, элээн каш вефил типографияларының дүрген парлаар дериг-херекселдеринге парлаттынгаш, 110000 ажыг хуралдарже чоргустунган. Ол оруктуң чада бүрүзүнде Вефилдерниң бараалгакчылары, буянныг медээни суртаалдаар деп эң-не чугула даалганы деткиири-биле, кызымаккай ажылдап турган (Марк 13:10).

• Вефилде кым бараалгап турарыл? Олар чүнүң-биле амыдырап турарыл?

• Вефил чүге херек?